ANG mga maguwang ang katambayayong sa mga ginikanan matag adlaw sa pagbantay ug pag-atiman sa ilang mga manghod labi na kon kini pulos nanarbaho.
Sama kini ni Kate Jane Babatuan, sa linghod nga pangidaron, kaabag na sa iyang mga ginikanan nga sila si Dante, 48, ug Genelyn Babatuan, 39, sa pag-atiman sa iyang unom ka mga manghod.
“Ingon ana nga pangidaron, si Kate mura na siya nahimo nga mama sa iyang mga manghod. Motabang siya og bantay sa iyang mga igsuon, kasaligan sa gimbuhaton sa balay,” saysay ni Genelyn bahin sa ikaduhang anak.
Walo ang mga anak sa magtiayong Babatuan.
Si Genelyn nihulagway ni Kate nga buotan ug sulundon nga pagkaanak, responsabli, matinahuron, ug mapinanggaon sa iyang mga igsuon.
Si Kate miyembro sa Lectors and Psalmits Ministry sa Sto. Tomas de Villanueva Parish sa Barangay Poblacion Pardo, siyudad sa Sugbo.
Matod ni Genelyn, agi og pahalipay ug pasalamat, ilang giandaman og debut party si Kate.
Si Kate, nagsaulog sa ika-18 nga kasumaran sa iyang adlaw nga natawhan niadtong Enero 16, apan niadtong Enero 26 gipahigayon ang iyang debut party sa Cebu Business Hotel, dungan sa birthday sa iyang manghod nga si Zachary Josh.
“Wa siya mangayo nga debuhan nako siya. Pero gihatag na namo silbi og pahalipay sa iyaha,” paambit ni Genelyn, maestra sa Tisa Elementary School, kinsa nitug-an nga Hunyo pa lang sa 2018 dihang iyang giplanohan ang debut sa anak.
Matod ni Nelly Babatuan, iyaan ni Kate, Hollywood ang tema sa debut party sa iyang pag-umangkon nga maoy ganahan kaayo niini.
Sa party, kaduha nag-ilis og gowns si Kate. Ang usa hinuwaman gikan sa iyang ig-agaw nga si Princess Cañares samtang ang usa inabangan sa usa ka boutique.
Ang mga bisita sa party mao ang mga miyembro sa banayng Babatuan, mga higala, ug mga kaubang maestra ni Genelyn ug katrabaho ni Dante sa Cebu City Transportation Office (CCTO). SCG