Vallena: Mga talan-awon

NAGPASALAMAT ko sa akong mga higala sa mountain biking community kay kon wa pa sila, wa ko maka appreciate sa kaanindot sa kabukiran. Wa usab ko makatultol sa maanindot nga mga rota. Wa usab ko makakita sa mga dapit sa Metro Cebu nga tago ang kaanindot, labina sa kasapaan ug kakahuyan.

Usahay dunay mangutana nako asang dapit ang among giagian. Maorag wa sa Cebu kuno.

Sa tinud-anay lang, daghang mga dapit ang maanindot apan wa lang makit-i sa kadaghanan. Kadaghanan nato gustong moadto sa laing nasod tungod kay nagtuo kitang lupig ang atoang lugar. Apan sayop kita kay daghan ang maanindot nga mga talan-awon nga wa nato nakita. Ako mismo mahingangha nga makakita sa maanindot nga mga talan-awon sa usa ka dapit. Sagad imo kining makita kon magsakay ka og duha ka ligid nga sakyanan, naay makina o tindakan ra.

Ambot ba, mahimuot sab ko sa mga tawo nga manuaw sa bukid kay moduaw sa dapit nga nabutang sa Facebook. Nindot kaayo tan-awon sa social media, apan masagumuyo ka kay ordinaryo ra diay. Daghang dapit nga nindot nga wa sa FB.

NEGROS ORIENTAL

Kon wa ka pa makaduaw sa Negros Oriental, suwayi ang Dumaguete City isip imong jump off point. Bisan mag target ka lang og duha ka mga dapit, ang Forest Camp sa Valencia ug Twin Lakes nga masulod nimo sa Sibulan, apan nahisakop sa tulo ka mga lungsod.

Kon gikan ka sa Dumaguete, maduaw nimo ang mao nga mga lugar. Kon mag mountain bike ka, mas sayon duawon ang Forest Camp nga nahimutang sa kakahuyan nga naa kilid sa dakong sapa. Kon ikaw nature lover, maka appreciate ka sa kaanindot sa palibot.

Di kaayo tungason ang dapit kay bisan sa pagpadung nimo sa Valencia gikan sa Dumaguete, inanay ra ang pagsaka. Ang challenging mao ang Balinsasayaw Twin Lakes kay mga 12 kilometros kini nga saka, nga dunay portion nga grabe ang slope katitip. Bisan ang akong scooter miutong sa pagtungas.

Kon nindot sa social media kining duha ka mga lugar, bisan sa personal, tinuod kining maanindot nga mga dapit. Lami pa ang mga pagkaon.

METRO CEBU

Naa kitay pipila ka mga dapit dinhi sa Cebu nga gi-develop usab ug maanindot. Apan nabalaka ko nga tungod sa grabeng commercialization maguba na ang mga dapit. Daghan na ang mga tawo nga manuaw ug makaguba sa dapit.

Sa duha ka mga dapit nga akong gihisgutan, ang mga nagdumala ni-resist ug nagdili sa mga buhat nga makadaut sa kalikupan. Dunay nadunggan nakong tanyag sa Forest Camp nga paliton ang portion, apan wa mosugot ang mga nagdumala.

Bisan sa Twin Lakes, daghan kaayo ang mga lagda nga gawas nga nagprotehir sa kalikupan, gipanalipdan usab ang mga hayop ug langgam nga namuyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph