SUPERBALITA CEBU

Sugilanon: Singkwenta ka tuig kanhi

DIHAY tulo ka mga kuyabog nanugdon sa estante sa mga relo ni Fidel,

Sa aseras sa Leon Kilat atbang sa Hope Pharmacy ug haduol sa Lane Theater,

Nakighinabi sila sa ubang mga alalay nga kuyabog samtang ang batan-ong dakbayan

Gitikyupan sa dagitabnong kangitngit.

Naghisgot-hisgot, nagbasa-balak sa ila kunohayng mga obra-maestrang balak ug sugilanon

Samtang nagtungab og tuba, San Miguel beer ug Tanduay rum.

Usahay modalikyat ang mga pinulhoan, silang Potenciano ug Ricardo, sa naandang tagbuanan

Aron pagpasiplat sa umaabot nga mga sumusunod.

Sa alas singko sa hapon ang mga kuyabog manakay og jeepney padulong sa Danao

Aron pagsumiter sa ilang balak, sugilanon ug gumalaysay ngadto kang Angel Enemecio

Sa Bag-ong Suga. Ug aron upod dawaton ang bayad sa napatik nga mga sinulat.

Unya sa alas nuybe sa gabii ang mga kuyabog magpiyak-piyak sa ilang mga balak

Sa DYBC ni Eking Guia Yap.

Nag-anam pagtuang ang ulan sa Fuente Osmeña ug Fort San Pedro.

Hagawhaw na lang ang mga talidhay sa Jones Avenue ug Colon.

Inanay nagpahilayo, na-distiyero, nanimpalad, nilangyaw ang mga batan-ong kuyabog

Ngadto sa mga buhilamang suok sa kalibutan.

Human sa singkwenta ka tuig nag-reyunyon ang mga batan-ong taligngan katalirungan

Nga mga higala-dagang, Erning, Lam, Eddie Boy, Roger, Rene, Israel, ug uban pa.

Ang mga kuyabog paglabay sa hataas nga katuigang paglupad mga tadhan na.

Salamat, Bathala, sa among panagtigom ug panagkita!

(KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph