KON kahatagan lang og kahigayonan, halos tanang kandidato gustong magpa-endorso sa presidente. Kay lagi dakong advantage o bentaha sa usa ka kandidato ma-endorso sa presidente labi pa kon kini popular pa. Sama ni Presidente Rodrigo Duterte kinsang trust ug popularity ratings nagpabiling taas bisan sa mga kontrobersiya nga gi-atubang.
Sumala god unsay nahitabo sa pagbisita ni Duterte dinhi sa Sugbo sa miaging semana atol sa rally sa partido sa administrasyon, halos tanan gustong magpa-endorso o magpa-isa sa ilang mga kamot ang mga lokal nga kandidato. Ang sabot unta nga walay i-endorse nga local candidates kay ang mga senatorial candidates lang. Apan wala masunod ang sabot kay gidagdasaan naman ang stage sa mga pulitiko nga gustong magpa-isa sa ilang mga kamot.Bisan hulagway lang nga nakatupad sa Presidente aron ikapanghambog.
Ang uban god nga wala mapagawas sa mainstream media ang ilang mga hulagway uban sa Presidente, ilang gipagawas sa social media. Samtang ang uban mipalit og space sa mga local newspapers aron lang mapatik ang ilang hulagway. Sigurado ko nga inig sugod na unya sa kampaniya sa local elections karong Marso 29 manggagawas ang maong mga hulagway.
Nakapadaog ba ang endorsement sa Presidente? Dili. Daghang mga kandidato sa pagka-senador o presidente ang gi-endorsed sa incumbent president ang nangapilde. Si kanhi House Speaker Jose De Venecia, gi-endorsed ni Presidente Fidel Ramos, napilde. Si kanhi defense Sec. Gilbert Teodoro nga gi-endorsed ni kanhi Presidente Gloria Macapagal Arroyo, pilde man. Si Mar Roxas, gi-endorsed ni Presidente Noynoy Aquino, pilde gihapon.
Sila si Vice Mayor Edgardo Labella ug kanhi Mayor Mike Rama opisyal nga mga kandidato sa pagka-mayor ug bise mayor dinhi da dakbayan ubos sa Barug PDP Laban. Usbon nako nga dako og advantage ang presidential endorsement apan dili garantiya sa kadaugan. Daghan ang factors nga angay i-konsiderar nganong magmadaugon ang usa ka local candidate. Usa niini ang iyang political party ug mga startehiya labi na ang pagpamalit og botos. Dili angay magsalig sila si Labella ug Rama niini kay dili bunot nang ilang kontra. (bobbygnalzaro@gmail.com)