DUHA mga hitabo dinhi sa Central Visayas ang nakapangutana nako kon naunsa na man kining drug list ni Presidente Rodrigo Duterte.
Una, giisa ni Presidente Duterte ang kamot ni Mike Rama sa miaging rali sa PDP-Laban dinhi sa Syudad sa Sugbo. Matod pa ni Rama, kining pag-isa sa iyang kamot nagpasabot nga gibakwi na sa presidente ang iyang gipamulong dugay na, nga siya usa ka drug lord protector.
Daghan kaayo ang nakalitan sa maong kalamboan labi na nga ang Presidential Management Staff (PMS) ug ang Presidential Security Group (PSG) sa mga briefing sa wala pa ang maong rali niinsister man nga walay pag-isa sa mga kamot sa mga kandidato sa lokal.
Apan nahitabo man gyud ang pag-isa sa kamot nga gihulagway ni Presidential Spokesman Sal Panelo nga “courtesy” kay dili gusto si Presidente Duterte nga mabastos si Rama samtang diha sa stage.
Kon atong tan-awn pagbalik ang video, niingon sab gyud si Duterte nga wala siya makaila sa mga kandidato gawas lang kang Kong. Gwen Garcia.
Hinuon, sakto man sab si PDP-Laban Jojo Dizon nga prerogative sa presidente kon modesisyon kini sa pag-isa sa kamot.
Ang nakapaukay lang gyud kay si Presidente Duterte man gyud niingon nga si Mike Rama usa ka druglord protector. Unya, wa pa gyud na ma-cleared si Rama sa listahan sa ga tinugyanan.
Ikaduha, niingon si kanhi Cabinet Secretary Leoncio Evasco nga nidagan karon sa pagka gobernador sa Bohol nga ang kandidato alang sa pagka bise gobernador sa iyang kaatbang naa sa drug list ni Presidente Duterte.
Dugay na man kining gihuhungihong si Alfonso Damalerio nga nalambigit sa gidiling drugas apan siya nagkanayon karong bag-o nga cleared na kuno.
Si Damalerio maoy nidagan alang sa pagka bise gobernador. Paris siya ni Kong. Arthur Yap nga nidagan alang sa pagka gobernador.
Pulos lig-on ang kampo ni Yap ug kang Evasco. Si Yap usa sa mga sinaligan ni Speaker Gloria Macapagal-Arroyo samtang si Evasco kanhi Cabinet Secretary.
Ang nakaapan kay igo lang niwarawara si Damalerio og papel nga wala mohatag og kopya sa mga sakop sa media.
Ang natural nga mahitabo man gud unta kay kon gipasanginlang nalambigit sa gidiling drugas apan maka-cleared, magpanikad na dayon nga ipasibya gyud ang maong clearance. Apan lahi ang nahitabo. Daw hadlok man si Damalerio.
Tungod niining duha ka mga kalambuan dinhi sa Central Visayas, nakita nako ang panginahanglan nga ipaguwa na sa media ang drug list ni Digong labi na karong panahon sa kampanya.
Magpapili na gud kining maong mga kandidato unya di ghapon kita makahibawo kon si kinsa kanila ang nalambigit sa gidiling drugas. (@anol_cebu sa Twitter)