USA sa labing bantugang manunulat nga Kristohanon mao si Dante Aleghieri, usa ka Italiano. Sa tuig 1320 gihuman niya ang usa ka libro nga gitawag og “Divine Comedy”. Naghisgot kini sa panaw ni Dante, isip usa ka dumuduong nga naniid, gikan sa impiyerno, latas sa purgatoryo, ngadto sa langit. Nagsugod kini sa bug-at ug bati nga reyalidad ngadto sa gaan ug maayo nga reyalidad. Simbolo ang maong libro nga usa ka pagsaysay pinaagi sa balak, sa panaw sa tawo padulong sa Ginoo. Morag lahi ang atong pagsabot sa komedyo sa atong kasamtangang panahon. Apan basin baya nga adunay kalambigitan gihapon. Ang tawo nga giseryoso kaayo niya pagtagad sa iyang kaugalingon, nga hikalimtan na lang ang Dios ug ang uban, kataw-anon.
May tulo ka mga punto ang ebanghelyo nga kataw-anon: “Mahimo ba nga ang buta moagak og buta?...Ngano nga makakita ka man sa puling diha sa mata sa imong igsoon, apan ang balabag diha sa imong kaugalingong mata wala man nimo mamatikdi?...Kay walay mayong kahoy nga nagahatag og dunot nga bunga; sa samang paagi, walay dunot nga kahoy nga nagatag og maayong bunga”. Kataw-anon kay adunay nagpatugatuga apan wala diay angay. Adunay seryoso kaayo sa kaugalingon, milutaw na hinuon ang ka dili takos. Kataw-anon.
Naay mga butang nga dili gayod matago: “Kay gikan sa kabuhong sa kasingkasing, molitok ang iyang baba”. Mogawas gyod ang natural. Kon nagpakaaron-ingon, kataw-anon na hinuon kaayo.
Kining mogawas gyod ang natural gihisgotan ni Sirac: “Ang pagpanulti sa usa ka tawo magpakita sa iyang mga kalapasan; sama kini sa usa ka salaan nga maglain sa hugaw... Ayaw gayod dayega bisan kinsang tawo sa dili pa nimo hindunggan nga siya mosulti, mao kana ang matuod nga prueba”. Bitaw kataw-anon pod ning mangbola, unya dili diha tinuod. Usahay sad nindot og porma apan inigsulti na, manggawas ang pagkabakikaw o pagkasalikwaot. Buking.
Ang hingpit nga komedya makita nato sa katapusang panahon. Sumala pa ni San Pablo: “Kon ang madunot masul-oban sa dili madunot, ug kon ang mamatay masul-oban na sa dili mamatay, matuman ang Kasulatan nga nag-ongon: ‘...O Kamatayon, hain na ba ang imong kadaogan’”. Pildihon sa nabanhawng Jescucristo ang kamatayon. Mao kini ang labing kataw-anon kay sa kalibotan, tungod sa sala, manghawodhawod baya ang kamatayon.
Padulong na kita sa Panahon sa Kuwaresma, unsa may kataw-anong sa atong kinabuhi?