NALIT-AG sa kapulisan sa Davao Region ang 18 ka mga wanted persons atol sa gilusad nga Oplan Kalinaw sa hiniusang puwersa sa otoridad sa nagkadaiyang dapit sa Davao City, niadtong Pebrero 28.
Sa impormasyon gikan sa Police Regional Office (PRO)-Davao, usa kini ka 4-in-1 package, diin nakahan-ay ang pagpahigayon sa programa ug paghatud og serbisyo sa katawhan.
Gilangkuban ang programa sa identity/background check ug profiling sa mga dayo nga mga residente.
Gidungan sab ang manhunt operations nga miresulta sa pagkasikop sa mga wanted persons.
Natigayon sab ang community outreach diin dunay free medical check-up ug pagpanghatag og mga medisina ug vitamins, ingon man ang community Empowerment pinaagi sa Crime Prevention Education sa mga lugar nga gitumbok sa kapulisan nga kinahanglan ang dugang kahibalo labot pagbatok sa kriminalidad.
Ang operasyon miresulta sa mokabat 953 ka mga tawo ang napailawom sa identity/background check ug profiling diin moihap lang sa 925 ka tawo ang dunay valid ID samtang ang 28 ka mga tawo walay mga ID.
Naaresto sab ang 18 ka mga wanted persons ubos sa gahum sa warrant of arrest sa nagkadaiyang serious criminal cases.
Dugang niini, mokabat 703 ang nakahimulos sa free medical check-up ug supplemental food feeding samtang 796 ka mga tawo ang nakadawat og libre nga medisina ug vitamins.
“Police Regional Office 11 will continue to intensify the campaign against wanted persons to support the program of the government in crime reduction and I am confident that through the re-intensified campaign on all kinds of crime activities, we will achieve a crime-free Davao Region,” sumala ni PRO-11 director Chief Supt. Marcelo Morales.
Ang Oplan Kalinaw usa ka regular nga aktibidad sa kapulisan sa rehiyon diin nagtumong nga mapabilin ang kalinaw ug ang paghatud sa serbisyo diha sa komunidad. (Jeepy P. Compio)