‘BOMBERO sa Barangay’ ang usa nag-una nga programa nga gilusad sa Bureau of Fire Protection (BFP 7) sa pagbukas sa Fire Prevention Month.
Kini aron mas mapahinumduman ang publiko sa mga pamaagi nga malikayan ang sunog.
Itandi sa susama nga period sa niagi nga tuig, nitaas og 82 porsyento ang gidaghanon sa sunog ning tuiga sa Central Visayas.
Kapin sa 10 ka mga fire truck, rescue ug ambulance vehicle sa BFP 7 ug dakbayan sa Sugbo ang nimotorkada sa mga dagko nga dalan sa syudad sa Sugbo, Biyernes sa buntag, Marso 1.
Gawas niini, nihimo usab sila og Unity Walk sa kaadlawon, gisundan sa pagpahigayon sa santos nga misa ug pagpanghatag sa mga safety tips flyers, ug ang fire fighting capabilities exhibit.
Pasiuna lang kini sa ilang himuon nga mga programa ning pagsaulog sa fire prevention month nga adunay tema nga ‘Ligtas na Pilipinas Ating Kamtin, Bawat Pamilya ay Sanayin, Kaalaman sa Sunog ay Palawakin”.
BARANGAY
Aron mahingusgan ang pagpanginlabot sa komunidad, hinungdan nga ila usab gilusad ang ‘Bombero sa Barangay’.
Diin gipasabot ni BFP-7 Regional director, Senior Supt. Gilbert Dolot nga sa matag barangay, aduna silay i-assign nga mga bombero nga makigtagbo sa mga barangay opisyal, aron sa pagsuta kon unsay problema ug posible nga solusyon aron malikayan ang sunog.
Dugang ni Dolot nga mismo ang kada sitio o purok ilang pasutaon sa problema ug ang paghimo sa fire safety plan sa lugar, aron mas dali kanila ang pagpatuman, tinabangan usab sa kabomberuhan.
Lakip sa hingusgan di lang ang pag-inspection sa mga business establishment, kundi ning tungura ang mga balay, human nga nag-una nga nasuta nga hinungdan sa sunog, ang kalabot sa problema sa electrical wiring, mga nag-overloading, ilegal nga nikabit o nikuha og kuryente sa mga poste o sa silingan ug ang paggamit sa mga substandard nga electrical wire ug appliances.
Sunod niini ang mga nabyaan nga giluto ug paggamit og alternatibo nga suga sama sa kandila.
“To address the problem, we engage the community through a partnership, dito sa aming programa ‘Oplan ligtas na pamayanan’para magawan ng plano with the community making ther own plans paano nila i-evacuate ang mga tao, paano nila i-prevent ang sunog, paano sila mag-react kon may sunog, sino ang initially fire fighter, mayron tayong first line of defense, lalo na sila yung andun sa mismo sa lugar diin nagsimula ang sunog,” nagkanayon si Dolot sa Superbalita Cebu. FMD