DI mominos 27 ka mga local disaster risk reduction and management office (LDRRMO) sa lalawigan sa Sugbo ang makadawat og Geographic Information System (GIS) gikan sa Kapitolyo.
Ang GIS usa ka sistema nga magamit alang sa spatial analysis sa mga hazard, risgo ug vulnerability nga mga mapa sa tagsa-tagsa ka lungsod o siyudad isip reference alang sa pagplano ug paghimo og aksyon sa mga local government unit.
Kini nga kahimanan nalantawan nga magamit sa tagsatagsa ka LGU alang sa paghimo sa ilang Climate Change Adaptation Management ug contingency plan.
Apil sa unang batch sa mga LDRRMO nga mahatagan og GIS license software ug computer sets mao ang mga lungsod sa Medellin, Barili, Alegria, Catmon, Alcantara, Malabuyoc, Pilar, Cordova, Dalaguete, Ginatilan, Pinamungajan, Alcoy, Poro, Tuburan, Dumangjug, Santander, San Fernando, Ronda, Compostela, Tudela, Santa Fe ug Madridejos.
Makadawat usab ang mga siyudad sa Talisay, Danao, Toledo, ug Naga ingon man ang PDRRMO.
Matag set sa GIS capable computer desktop nagkantidad og P65,000 samtang P193,511 ang ArcGIS software nga may perpetual license o kinatibuk-ang P258,511 matag LGU.
Ang kagamhanan sa lalawigan sa Sugbo maoy nipundo og P6.979 milyones alang sa maong proyekto.
Isip kabahin sa padayon nga suporta sa mga LGU, ang PDRRMO mohimo og training sa mga LDRRMO alang sa pagsabot sa GIS data nga maglakip sa light detection and ranging (LiDAR) ug ang mga proseso ug aplikasyon sa drone mapping.
Sa miaging tuig, ang Cebu Provincial Board nihatag og pagtugot kang Gobernador Hilario Davide III nga mosud og Memorandum of Agreement tali sa mga siyudad ug lungsod sa lalawigan.
Matod ni Baltazar Tribunalo, pangu sa Provincial Disaster Risk Reduction and Management Office (PDRRMO), dugay na nila nga gipangandoy nga makabaton og GIS ang mga LGU sa lalawigan gumikan sa kamahinungdanon niini.
“We have this program long time ago and we found out the need for science ways assessment especially to areas where disasters are always happening. We need to have a map,” pasabot ni Tribunalo atol sa full council nga tigom sa Provincial Disaster Risk Reduction and Management Council (PDRRMC) niadtong Huwebes, Pebrero 28,
Sa samang tigom, si Ferdinand Mendez sa PDRRMO, namahayag sa mapa makita ang tracking sa data.
“We can make some analysis on who are at risk and who are vulnerable... By that we can come up with recommendation or decision,” dugang niini. SCG