MISAAD ang Multifarms Agro-Industrial Development Corp., nga mobayad sa multa nga P14.5 milyones nga gipahamtang sa Pollution Adjudication Board ug mopatuman usab kini sa mitigating measures sud sa gitakda nga tagal sa Environmental Management Bureau (EMB) 7.
Si William Cuñado, regional director sa EMB 7, nimando sa Multifarms nga dili na mag-discharge sa hugaw sa piggery ngadto sa dagat aron malikayan ang polyusyon.
Atol sa kapin usa ka oras nga closed-door technical conference sa buhatan sa EMB 7 pagka Biyernes, Marso 1, si Santiago Tan Chan Jr, presidente sa Multifarms, nipirma sa commitment sheet nga nagsaad nga mosunod sa mga rekisitos sa Republic Act 9275 kun Philippine Clean Water Act ug mopatuman og zero discharge policy.
Gisuwayan sa Superbalita Cebu nga makuhaan og habig ang tag-iya sa piggery apan nihangyo kini nga dili.
Si Cuñado nibutyag nga bayran sa Multifarms ang P14.5 milyones sud sa usa ka semana o hangtod sa Marso 8, 2019.
Sa samang commitment sheet, si Tan Chan nipasalig nga sa dili pa ang Marso 16, mahuman ang pagbutang og dugang biogas digester, 20 porsyento sa wastewater sa baboyan adto ibomba sa bakante nga lote sa kompaniya, ug sud sa 20 ka adlaw temporaryo nga ipundo ang ilang wastewater.
Sugod karong Sabado, Marso 2, moduso usab kini og status reports matag adlaw ngadto sa EMB nga i-email sa legal division sa buhatan.
Si Cuñado niingon nga kon dili motuman ang Multifarms sa mga gisaad niini, pamultahon kini og P50,000.
“Magtinumanay lang ta sa sabot. Kon di ka motuman, mapugos kog impose the law. Whatever unsay nabutang sa law, di man ko mahadlok moigo, daghan na kaayo kog gi-imposan. Basta trabaho lang, wa gyud koy personalan, migo ta migo, pero di nato gamiton ang atong pagka amigo nga ma-violate nato ang law,” pahayag ni Cuñado dihang nahinabi sa Superbalita Cebu.
Sumala niini nagpadayon ang operasyon sa piggery kay nagpatuman kini og mitigating measures aron malikayan ang polyuson sa kadagatan diha sa Sitio Magtalisay, Barangay Sangat, lungsod sa San Fernando.
Siya nidugang sa gisumitir nga data sa Multifarms sa ilang buhatan, pasado ang resulta niini base sa mga sample subay sa effluent standard.
Ang effluent standard mao ang analysis sa hugaw nga nigawas gikan sa baboyan.
“Ilang gi-present, nag-series man sila og self monitoring unya ubos man kaayo tag 20, tag 30, pasado ba, although accredited na nga laboratory di man gud na nato i-consider nga official nga resulta diri sa atua,” pasabot ni Cuñado.
Nagkuha sila og kaugalingong mga sample sa effluent water o wastewater gikan sa piggery ug ang resulta mahibaw-an karong Dominggo.
“Whatever the result hagbong man o dili, i-endorse namo sa PAB for the implementation. In the meantime, we have already ordered them to stop na discharging,” dugang ni Cuñado.
Siya nikompirmar nga nag-apply karon og environmental compliance certificate (ECC) ang Multifarms alang sa ekspansion nga himuon niini.
Matod niya, sa una sa wala pa ang balaod, exempted ang piggery mokuha og permit apan sanglit magpalapad kini, kinahanglan na kini dunay permit sa ilang buhatan.