NAHILAKIP sa mga pasidunggan sa Sportswriters Association of the Philippines (SAC)-San Miguel Corporatiion (SMC) Sports Awards mao ang tulo ka mga magduduwa, duha ka coaches ug usa ka team nga naghimo’g langas alang sa football event sa miaging tuig.

Ang tinuig nga kalihukan ipahigayon karong Marso 11 sa Casino Español.

For updates from around the country, follow Sun.Star on Twitter

Pasidunggan nga mga magduduwa mao sila si Paolo Pascual, Christian Noel ug Carmelo Genco nga pulos nasulod sa Philippine age group teams lakip na ang coaches nga sila si Glenn Ramos ug Oliver Colina hasta ang Abellana National School.

Si Noel niduwa sa RP team nga gigiyahan ni Ramos alang sa Asian Football Confederation (AFC) Under-16 championships sa Bacolod samtang si Genco naapil sa RP team nga ningkombati sa Asean Football Federation U14 championships sa Singapore.

Sa iyang bahin, si Pascual napiling starting keeper alang sa RP Under 19 nga ningsalmot sa AFC Qualifiers sa China.

Ang pagkasulod ni Pascual sa RP team giingong talagsaon rang hitabo kay mismong ang iyang mga nakontra sa Palarong Pambansa ang nagrekomendar kaniya.

Giimbitar sab siya aron moduwa sa senior team apan nibalibad kini tungod sa obligasyon niini sa akademya.

Kanhi sakop sa RP training pool, si Colina maoy usa sa mga coach sa Cebu  International School. Siya maoy bugtong Pinoy nga naka-qualify sa AFC Project Future coaching course.

Nakapasar si Colina sa duha ka malisod nga pagsuway sa Malaysia ug naapil siya sa 22 ka coaches gikan sa nagkalainlaing nasod nga nakapasar sa coaching course.

“We only want those who are committed to coaching and want to stay in the game,” matod ni AFC Project Future director Gary Phillips sa taho sa AFC.com.

Ang ANS football team ni coach Francis Ramirez makakuha og citation gumikan sa pagsakmit niini sa secondary title sa Milo Little Olympics National Finals. (Pooled Report)