MGA ahos gipaibabaw sa binultong druga aron dili masimhotan sa drug sniffing dogs?

Modus nga nadiskubre sa uwahi nga labing dakong kantidad sa sbabu nga nasakmit sa hiniusang operasyon sa awtoridad sa duha ka konektadong dapit sa sindikato sa miaging Dominggo, Marso 3.

Nisumada kini tanan og P190,400,000 base sa value sa Dangerous Drugs Board (DDB).

Unang operasyon ug dakong parte sa druga nga nasakmit mao ang gikan sa buy-bust sa mga sakop sa Drug Enforcement Unit (DEU) sa Pardo Police Station ug mga operatiba sa Cebu City Police Office (CCPO).

Malampusong nakuha ang 18 ka kilo nga shabu gikan sa balay nga giabangan ni Elymar Tampos Ancajas, 24, sa Fatima Homes, Barangay Inayawan, dakbayan sa Sugbo, ala 1:30 sa kaadlawon.

Si Police Major Regino Maramag, nangulo sa kapulisan sa Pardo sa naasoy nga operasyon, nisakmit sa siyam ka dagkong putos sa shabu nga motimbang ang tanan sa 18 kilos nga mobalor sa P122,400,000.

Lakip sa gisakmit mao ang sakyanan nga gikargahan sa mga druga.

Sa pagsukitsukit sa mga imbestigador sa Pardo Police Station kang Ancajas, iyang gitug-an nga ang tinubdan sa druga kay gikan sa usa ka Jocelyn Encila sa Green Valley Subdivision, Barangay Casili, lungsod sa Consolacion.

Gihimo dayon ang operasyon ug transaksiyon diha sulod sa usa ka inilang ospital sa lungsod human ang subject nga si Encila naospital tungod sa sakit nga kalibanga.

Ug si Encila nimando na lang sa posuer-buyer nga usa ka pulis nga kuhaon ang shabu sa iyang mga ginikanan sa iyang balay sa Casili.

Human positibong nakuha, nagpaila na ang nagpatuo nga buyer nga usa siya ka pulis ug gidakop ang amahan ug inahan sa suspek nga silang Marcial ug Marilyn Encila.

Nakakuha ang kapulisan og lima ka dagkong putos sa shabu nga motimbang sa 10 ka kilo nga mobalor sa P68,000,000 base sa DDB value.

Nakakuha usab sila og kuwarta ug nagkadaiyang alahas sa suspek ug ang tulo ka sakyanan sama sa Toyota Fortuner, Toyota Grandia ug Nissan SR nga gituohan nga gikan sa halin sa ilegal nga drugas isip dugang ebidensiya.

Lakip sa gipangkustodiya sa kapulisan ang laing pito pa ka personalidad apil na ang tulo ka mga bata nga gidala sa Department of Social Welfare and Development (DSWD).

Matod ni Police Colonel Royina Garma, direktor sa CCPO, nga ang maong kalampusan resulta kini sa una nilang anti-drug operation niadtong Pebrero 16 diin ilang nadakpan si Danilo Flores nga nakuhaan og duha ka kilo nga gituohang shabu.

Gibutyag ni Flores kon asa niya kuhaa ang supply sa ilegal nga drugas nga maoy hinungdan nga ilang gipaubos sa surveillance ang mga pangalan nga gipangtug-an ni Flores.

“Lumalabas na nasa Igot drug group, at ang pinaka main source is nakakulong ngayon sa NBP Muntinlupa, so ang nahuli natin ngayon.." matod ni Garma.

Gitug-an ni Ancaja sa imbestigasyon nga gikan kang Rustico Igot nga sakop sa Igot drug group ang supply sa ilegal nga drugas.

Si Igot giingong kanhi kapuyo ni Encila nga maoy mo- facilitate sa pagbiyahe sa ilegal nga druga gikan sa kaulohan paingon sa Consolacion ug ubang dapit sa lalawigan.

Ang 28 kilos nga shabu nga nakuha sa kapulisan kabahin kini sa 40 kilos nga naabot sa balay ni Jocelyn.

Unang gipadala ang 20 kilos niadtong Disyembre 2018 ug laing 20 kilos sa Enero 2019.

Apan napugngan ang pag-deliver sa 40 kilos sa shabu human mapatay sa mga sakop sa Provincial Intelligence Branch ang usa ka alyas Quazar Quianchon niadtong Enero 30, 2019 sa siyudad sa Talisay.

Tungod sa kadaghan sa kabtangan nga nakuha gikan sa suspek sama sa mahalong sakyanan ug mga alahas, ipasusi ni Brigadier Gen. Debold Sinas, direktor sa Police Regional Office (PRO), sa Anti-Money Laundering Council (Ampac) alang sa pagbawi sa mga kabtangan. (B)