PATAY na nga nakit-an sa iyang igsuon ang usa ka 24-anyos nga accounting staff sud sa ilang panimalay sa Barangay Paciano Bangoy, Davao City Sabado sa hapon, Marso 2.
Giila ang biktima nga usa ka alyas Jimmy, 24-anyos, accounting staff, ug residente sa maong lugar.
Sumala sa imbestigasyon nga una pa nahitabo ang insidente, anaa sulod sa ilang panimalay ang biktima kauban ang iyang usa ka 19-anyos nga igsuon.
Taud-taud, nananghid ang biktima nga mosulod sa iyang kuwarto diin dangtan og pipila ka minuto, usa ka kusog nga tingog ilang nadunggan gikan sa kuwarto sa bikima apan ila lamang kini gibaliwala.
Milabay ang mga minutos ilang gitan-aw ang biktima sud sa kuwarto ug didto nadiskubrehan nga nagbitay na kini gamit ang electrical extension wire nga gihigot sa iyang liog.
Nasayran gikan sa pamilya sa biktima nga duha ka semana na nga naka-on leave ang biktima sa iyang trabaho gumikan sa gireklamo niini nga sakit sa iyang likod.
Giingong nagpa-checkup na kini sa doktor diin wala makita ang problema sa gihambin niini nga balatian, apan sa ulahing doktor nasayran nga subay sa paghiling nakit-an nga duna kini impeksyon sa dugo.
Walay nakitang foul play ang kapulisan sa kamatayon sa biktima apan giaghat ang pamilya nga ipailalom sa otopsiya ang patay’ng lawas.