NA-ADMIT sa balay tambalanan ang usa ka batang babaye human nibuto ang tablet nga gituohang na-overcharged diha sa lungsod sa Jasaan, Misamis Oriental.
Nag-viral karon sa social media ang post ni Realine Ruiz ug gipakita ang mga hulagway sa iyang igsuong babaye nga nga mao si Shane nga nangalapnos ang mga kamot ug tiil gumikan sa pagkasunog.
Nahitabo kini niadtong Pebrero 28 sa kadlawon kon diin maayong hinanok sa katulog sa bata sulod sa lawak sa ilang inahan dihang kalit mibuto ang tablet ug tungod kay duol raman ang biktima maoy naigo.
Gituohang na-overcharged kini og nag-overheat hinungdan nga nibuto.
Ang biktima gidali karon ug dala sa ospital sa lungsod sa Jasaan kinsa padayon pa nga giatiman sa mga doctor.
“Sa una sige rako kakita og post nga ingon ani ang nahitabo ug karon sa amoa na gyod nahitabo. Unta leksyon ni para sa uban,” dugang sa post ni Realine.
Hinuon wala na midako ang kalayo sa pagkasunog kay dali kining natabang sa pamilya.
Si Fire Officer 3 Alfon Echeveria sa Jasaan Fire Station nga nahinabi sa SunStar SuperBalita niingon nga wala kini nareport nga insidente sa ilang buhatan.
Dugang niini nga kanunay silang nagpahimangno sa ilang ginsakupan sa lungsod nga magbinantayon gyod ug dili malimot sa pag-ibot sa mga nakapansak sa dili pa matulog ug mobiya sa puloy-anan.
Hilabina karon nga gisaulog ang Fire Prevention Month ilang gibalik-balik nga dili lang karon nga bulan apan tibouk adlaw magbinantayon sa mga butang nga posibleng sinugdanan sa sunog.