GIPASIDUNGGAN sa Police Regional Office- Central Visayas ang Pardo Police Station ug pipila ka mga indibidwal human sa malampusong pagkasakmit sa 18 kilos sa gituohang shabu sa barangay Inayawan adlawng Dominggo, Marso 3.
Nangulo sa pag hatag sa pasidungog ang hepe mismo sa PRO - Central Visayas Brigadier General Debold Sinas ug Cebu City Vice Mayor Edgardo Labella.
Gidayeg pag ayo ni Labella ang mga pulis sa syudad nunot sa walay poas nga kampanya batok sa illegal nga drugas.
Iyang gihulagway nga alarming na kaayo ang kadaghan sa drugas nga nasakmit sa kapulisan diin kini nagpasabot nga daghan pa gihapon ang mogamit niini dinhi sa Sugbo.
Si Brig. Gen. Sinas nakabantay nga daghan na nga illegal nga drugas nga nasakmit sa barangay Inayawan, diin ang barangay kapitan giingong mibabag sa pag tukod og police station sa maong lugar.
Tungod niini iyang ipaubos sa imbestigasyon ang kapitan lakip na ang pag kaykay sa iyang records nunot sa pag kontra niya nga pabutangan og police station sa barangay Inayawan.
Ipasusi usab niya kung aduna bay armas ang maong barangay kapitan dungan sa bahad nga manubag kini sa balaod. (AYB)