ADUNA na’y tagsa-tagsa ka mga quick reaction teams ang gimugna sa Department of Agriculture (DA)- Central Visayas aron mosusi sa kahimtang sa mga lugar nga maapektohan sa El Niño.
Kini mao ang gibutyag ni DA – Central Visayas Regional Director Atty. Salvador Diputado.
Gawas niini katambayayong usab sa mga quick reaction teams ang mga Municipal Agriculture Officers aron usab sa pag-monitor kon aduna'y mga taho sa pagdagsa sa peste sa mga pananom sa ilang mga lugar.
Matod ni Diputado nga wala pa hinuon sila makadawat og taho nga anaa na sa kritikal nga lebel ang pagkatap sa mga peste nga makamugna og kadaot sa mga pananom.
“So far, wala pa ta makadungog dinhi sa region nga alarming or critical na ang level. Naa na'y mga indications pero every now and then duna man sab taligsik,” matod ni Diputado.
Sa Central Visayas, ang Bohol pa lang ang aduna'y reported nga pagpangliki sa yuta sa mga umahan apan wa pa kini makonsiderar nga angayan ikabalak-an.
Gipasabot ni Diputado nga ang buwan sa Marso mao ang sinugdanan sa buwan sa ting-init.
“Kung mo us-os nana ang mga tubig sa dams, dinha na mag-meet ang mga QR teams to discuss the matter,” dugang sa direktor.
Nipahibawo usab si Diputado nga adunay nakaandam na nga pondo alang sa mga mo-request og cloud seeding operations sa mga lugar nga nanginahanglan niini.
Apan matod niini nga aduna kini'y limitasyon sanglit mag-agad kini sa panganod ug hangin.
Samtang, nipasalig usab si DA Secretary Emmanuel Piñol nga aduna'y pondo nga nakaandam aron sa pagseguro sa mga pananom sa mga mag-uuma ubos sa Philippine Crop Insurance Corp.
“DA is more prepared than ever before. You wouldn't see farmers nga mag-rally to ask for rice,” matod ni Piñol.
Sa iyang pagbisita sa Bohol niadtong adlawng Marso 1, gitataw ni Piñol nga makasanati gyud og hinayng El Niño ang Central Visayas ingon man ang Palawan ug Mindoro. (HBL)