Wander woman mirampa sa Cogon Market

(Photo by Kris C. Sialana)
(Photo by Kris C. Sialana)

NALINGAW ug nabibo ang katawhan sa kalit pagtunga ni “wander woman” ug naglaroylaroy palibot sa merkado niadtong Pebrero 21 diha mismo sa Cogon ning siyudad sa Cagayan de Oro.

Luyo sa paghatag og lingaw niining gibansagan nga si “wander woman” sa Cagayan de Oro ngadto sa katawhan mao ang usa ka hilumon ug “shy type” nga si Dexter Morera, 22, kinsa nigradwar sa University of Science and Technology of Southern Philippines (USTP) dinhi sa siyudad ug kasamtangang call service representative sulod sa dul-an duha na ka tuig sa siyudad sa Cebu.

Proud kini nga usa ka miyembro sa lesbian, gay, bisexual, transgender (LGBT) community apan dili kini gasul-ob og mga sapot alang sa babaye ug dili ga make-up nga gikakurat sa mga higala ug kauban human nga nag-viral ang iyang hulagway sa pagbisita sa Cogon market diin siya nagpahulagway sa mga utanon, mga barbeque, ug bisan diha sa mga dyip pasaheroan.

“Hangtod karon di ko ga cross dress tapos ako mga kaila kay surprised kaayo kay wala sila nag expect na makaya ko to knowing na shy type ko sauna samot ako mga teachers sauna,” matud ni Morera.

Nasayran nga buot kini magsugod dinhi mismo sa siyudad diha sa pag-share sa iyang talent ug paghatag og lingaw sa katawhan ilabi na usab nga giisip na ang Cagayan de Oro maoy ikaduhang pinuy-anan.

“Ako ra gyud to siya gibuhat para sa Cagayan gyud, taga CdeO man ko nagboard lang ko sa Cebu, taga Bukidnon ko nagpuyo pero CdeO akong gidala nga address kay diha man ko nagstay sa college pa,” matud ni Morera.

Mahilig kini sa make-up ug mga cosplay costumes hinungdan nga human sa ilang Halloween party niadto lamang Nobiyembre 2018 sa ilang pa contest nakahunahuna kini nga sugdan ang paghimo sa susama niini diin tumong nga makahatag og lingaw sa katawhan. Kini usab mismo ang naghimo sa kaugalingong mga costume nga ginama lamang sa nipis nga foam.

“So far mao pa na kay bag-o paman ko nagsugod atong contest sa company namo sa halloween last November mao tong Tinkerbell, wala ko nakadaog ato pero nagstart ko ato,” dugang niini.

Dugang pa nga kalipay niini ang mag make-up ug first time niini mag cross dress niadtong Nobiyembre.

“Mao nalipay gyud ko mas daghan naka-appreciate, samot na pagphotoshoot gyud namo bibo gyud kaayo, wala pako nag one year sa makeup pero lipay gyud kaayo ko every time mag makeup ko pero dili ko mag makeup everyday kay dili nana ako, pag naay event lang, mao makurat pud ang tanan kay if normal day normal ragyud kaayo pero pag naay event kabog sad,” rebelasiyon niini.

Andam usab kini sa mga bashers ilabi na diha sa social media gumikan kay ang importante niini mao lamang ang makahatag og kalipay ug magfocus na lamang sa mga good side o positive side sa gihimo.

“Mas open nako, dili gyud nato maplease tanan, so long na nalipay ko ug naa poy nalipay go ra ko, mas focus ko sa good side,” dugang niini.

Gidugang pa usab niini nga lakip ang pamilya ang nakurat gumikan kay ayha pa kini nakita nga nagsul-ob og sexy ug naka makeup bag-ohay lang.

“Actually na kurat sila pud kay ayha pagyud ko nagpakita atong pag-uli nako nga mag makeup nako ug magsuot og sexy, katong Tinkerbell first time nako to mag makeup gyud in public ug mag cross-dress as in first time last November,” pahayag niini.

Naglaom usab kini ug kampanti nga suportahan sa pamilya ang kalipay niini diha sa pagpakita sa publiko sa mga mismong ginama nga mga cosplay costume ug pagmake-up.

“Wala gyud mi nag-istorya about ani pagyud na heart to heart talk kay nibalik nakog Cebu man, malipay lang ko mag transform, at first mabag-ohan sila gyud feeling nako pero kaila ko nila basta makita nila na nalipay ko ug naa pud nalipay sa ako gibuhat support jud na sila, daghan man gali proud bisag dili close sila pa kaha?” dugang ni Morera.

Nigawas na usab kini diha sa lokal nga programa sa telibisyon ug gani daghan na usab ang nagrequest kaniya nga magsul-ob og ubang mga cosplay costume diin plano niini mao ang Malificient apan tungod kay unang naila isip “wander woman” kini matud ang pabilin nga identipikasiyon sa pagkakaron.

“Kay ginganlan naman nag wander woman so expected na maglaroy laroy pana bisag asa,” ang nagkatawa nga pahayag niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph