Lalaki napalgang nagbitay sa punoan sa kahoy

LAING lalaki na usab ang napalgang nagbitay sa punoan sa kahoy Lunes sa buntag, Marso 4, sa Purok 4, Barangay Gusa siyudad sa Cagayan de Oro.

Patay si Toto Arseño, 26, taga Pangantucan, Bukidnon.

Sa nahipos nga impormasiyon gibutyag nga nisaka kini sa nakaparada nga trailer truck nga maoy iyang gitungtongan aron maabot ang kahoy diin gihikot ang pisi.

Giingong napalgan kini sa dihang dunay nangihi sa maong dapit.

Subay pa sa ig-agaw niini nga posibleng problema sa pamilya ang hinungdan sa pagtapos niini sa iyang kinabuhi. Gidugang pa nga posibleng duna na kini plano ilabi na nga gikan pa sa Lapasan ang pisi nga iyang gigamit nga gipanag-iyahan sa uyoan.

“Naghikog gyud ni siya, sige ra na siyag hinuktok, ako lageng tan-aw murag sa iyang pamilya naa man gud naka istorya sa akoa, ambot kung gipalayas o nilayas siya,” matud sa ig-agaw niini.

Sa pagkakaron ang patay nga lawas ang anaa na sa usa sa mga punerarya sa siyudad.

Samtang, giawhag sa Department of Health kadtong adunay gihambin nga mental illness o depression sa pagdangop sa ilang Hopeline hotline sa numerong (02) 804-HOPE (4673), 0917558 HOPE (4673), 2919 (toll-free number for all Globe and TM subscribers).