USA ka bata nga nagviral diha sa social media tungod kay samaran human mibuto ang tablet nga gi-charge diha sa Barangay Dayawan, lungsod sa Villanueva, Misamis Oriental.
Naka-chat sa SunStar SuperBalita si Realine Hernando Ruiz, kinsa maoy nagpost ug mga hulagway sa igsuon sa 10 anyos nga bata nga naghambin og daghang lapnos sa kalawasan dihang mibuto ang tablet gumikan kay na overcharged kini.
Matud ni Ruiz nga ilang gidudahan dili gyod ang tablet apan ang charger nga daw gitouhan niining peke tungod kay dali lang kaayong moinit.
Kalit kining mibuto hinungdan sa pagkasunog sa pipila ka bahin sa lawak ug nalakip ang 10 anyos nga hinanok sa pagkatulog niadtong tungora.
Daw taod-taod sab nga nakuha ang bata sa iyang pamilya sulod sa lawak, hinungdan nga nasunog.
Gikan sa Jasaan Community Hospital, kun diin una kining gidala sa pamilya ang gibalhin na karon sa Northern Mindanao Medical Center (NMMC) siyudad sa Cagayan de Oro.
Si Ruiz nanawagan sa katawhan nga magbinantayon labina diha sa pag charged sa ilang mga gadgets ug siguraduhon nga dili magpalit og mga charger nga gitouhan niining peke nga posibleng dali lang mag overheat aron likay sa disgrasya.