DEAR Noy Kulas,
Good day to you!I’m one of your fans. Just call me Polaris, 22, from Cebu city. My problem starts adtong na end ko sa akong work while ako nag-estambay, ni enter ko og chat. I found some foreigner nga ni-help nako sending money through online.
One foreigner from U.S.A. named Mr. Jason likes me soo much.
Maayo siyang tawo, friendly and most of all loving guy. But he doesn’t know nga dunay koy boyfriend. Serious ug sincere kaayo siya nako. Nagkakita na mi ug gusto siyang makigkita kanako.
Nag-process na kog visa karon. Mobalik siya karong tuiga alang sa among kasal.
Apan duna koy boyfriend nga 30-anyos nga Pinoy nga wa masayod nga duna koy karelasyon. Ang iyang nahibaw-an nga amigo lang mi sa Kano nga willing motabang kanako nga makagawas ko.Usahay magselos siya kang Jason kay lalake lagi apan akong giingnan nga suod ra mi ni Jason. Matod niya nga di ko mosalig sa tawo kay di kaayo nako kaila.
Gisultihan nako siya nga kami ang magminyo kon duna na koy igong matigom alang sa among ugma. Apan gikinahanglang molarga ko. Mao nga nikalma siya. Di niya kayang mawala ko kaniya. Seryuso siya kanako.
Ang akong pamilya nakauyon sa Kano kay lagi maayo man ang akong ugma. Karon naglibog ko unsa ang akong buhaton.Usahay maghilak ko nga maghuna-huna. Unsa may akong buhaton? Pareho ra man sila, but it’s between peso and dollar. Please tambagi ko.
POLARIS
Polaris,
Maayong adlaw. Lisod sab nang choice nimo da. Unsa may imoha, gugma or kuwarta? Sa akong tan-aw, pulos man nimo sila gihigugma. Di ba? Maluoy lang kang dunay masakitan nilang duha. Sakto ba ko?
Sa gugma, naa man gyuy modaog, duna say mapilde. Di man gyud na malikayan kay ingon ana man gyud na. Sometimes mohimo kag hard choice nga bisan dunay masakitan, gikinahanglang buhaton nimo. Ning higayuna, nahigugma ka sa duha. Ang disadvantage sa usa kay peso lang ang iyaha. Samtang ang ikaduha dolyar.
Kon ako lay imong pangutan-on, di man uwaw kon mopili ka sa foreigner not just because of money, but tungod kay nahigugma ka kaniya.Di ba? Sa ato pa, di lang kay tungod sa material nga katarungan kon mopakasal ka kaniya. Tungod sab kay duna kay pagbati kanilang duha.
Sa timbangay pa, dunay aspetong mas bug-at si Jason kay sa Pinoy, labina kay ganahan sab ang imong pamilya niya being a foreigner. Kini nga mga aspeto dako kaayog epekto sa imong desisyon ug ugma nimo. Kay naghuna-huna ka man sab nga makatabang sa imong pamilya puhon.
Apan kon mo-decide ka man gani, sultihi sab tawon nang Pinoy sa imong desisyon. Ayaw tago-tagoi kay lain baya nang magdahom lang intawon. Atubanga ang imong responsibilidad sa pagsulti sa matuod. Kana bisan kon siya bation pa og kasakit. Kay sa magpatuo kang duna kay plano alang kaninyong duha.
NOY KULAS
r