WALA tay ebidensiya apan dili malilong sa publiko nga dunay mga politiko nga mitunol og hinabang ngadto sa mga teroristang New People’s Army (NPA) atol sa ilang pangampaniya.
Dili na ikatingala kon dunay kandidato nga mosud sa balwarte sa mga komunista unya way bodyguard nga pulis o militar.
Bag-o lang mipahimangno ang Department of Interior and Local Government (DILG) sa tanang kandidato, bisan dili kandidato, nga dili gyud mohatag og suporta – financial, material o political support - ngadto sa komunistang grupo.
Basi sa balaod, Republic Act 10168, kinsa kadtong mohatag og suporta sa bisan unsang paagi alang sa kalihukang terorismo, mag-atubang og silot nga pagkabilanggo ug multa nga dili mominus sa P500, 000.
Sukad sa miaging mga eleksiyon, wa pa gyuy napasakaan og sumbong tungod sa pag-ayoda sa mga teroristang kalihukan. Ngano kaha?
Si Brigadier Genral Nemesio Gacal, ang 4th Infantry Division commander, miingon gihingusgan nila pag-ayo ang kampaniya sa iligal nga kalihukan sa mga NPA sa pagpangilkil ngadto sa mga kandidato.
Sa samang higayon, subling gipahimangnuan ni Gacal ang mga kandidato nga dili sila mohatag og suporta ngadto sa mga komunistang NPA.
Ang problema dinhi mao nga way politiko nga moangkon nga mitunol sila og kuwarta ngadto sa mga terorista. Maglisod man gani na sila og angkon o pahibaw kinsa kadtong mga negosyanti nga mipundo sa ilang pangampaniya.
Ang bugtong matabang ra gyud sa mga botante mao nga timan-an nila kadtong mga kandidato nga yano ra kaayo mosud sa mga “ngilit’ nga dapit nga way escort nga pulis o military, kay segurado lahi nga grupo ang nagbantay sa ilang seguridad.
Kining mga kandidatoha, dili angay suportahan kay kon basihan nato ang balaod, guilty gyud sila. Labaw pa sila sa mga terorista.
Pero, hagiton nato ang military ug kapolisan, idiga nila kon duna man silay listahan sa mga kandidato nga nagsuportahan sa mga NPA.
Tuod no, nganong wa may nakasuhan hangtod karon nga daghan naman untang mga negosyante o opisyal sa gobiyerno nga nabulgar nga naghatagan og ayoda sa komunista. Kaniadto pa baya na nanggawas ang mga listahan.
Likayan nato kining mg kandidato nga labaw pang terorista kay sa mga NPA.