SUBLI nga nipahinumdom karon ang mga meat inspector ngadto sa mga supplier ug dealer sa mga karne, nga dili gyud mosulay sa paglapas sa balaud, ug masiguro nga dili daot ang mga karne ug adunay sakto nga dokumento.
Kini human nga ang meat inspection section sa Mandaue City Veterinary nakasakmit og 10 na ka mga meat vans sa nagkadaiya nga klase sa mga karne, sukad pa sa Enero ning tuiga hangtud sa pagsugod sa Marso.
Ang ika-napulo ang nahitabo pasado alas 6 Lunes sa buntag, Marso 4.
Gitug-an ni Dr. Karen Merilles ang Mandaue City Veterinarian, nga ang mga karne sa manok, nga gibana-bana nga mobalor gikan sa P50,000 hangtud sa P70,000 kon mahalin na, ang gisunog ug gilubong sa luna sa napasirad-an nga ihawan sa Barangay Labogon.
Kini human nga nasuta nga ang Meat Inspection Certificate (MIC) nga gidala sa meat van, ang dili iya sa nagpadeliver, kun dili sa supplier niini, ug sa MIC, ang nakabutang nga petsa Marso 2 pa kini giihaw.
Gipasabot ni Merilles, nga ang pagdala sa meat van og dili iya nga MIC, pagsabot nga posibleng gibalhin-balhin lang ang mga karne, diin sa maong paagi, posible kini masagulan og mga daot na nga karne. Hinungdan nga makonsiderar kini nga “hot meat.”
Giingon nga ang dealer niini ang gikan sa lungsod sa Consolacion.
Wala nalang una hinganli ni Merilles ang nanag-iya sa maong meat van, apan iyang gitug-an nga aduna kini mga meat stall sa mga merkado sa Mandaue, Cebu City, Lapu-lapu City ug sa Consolacion.
Ug gawas nga namaligya kini sa mga merkado, nihimo na usab kini karon isip dealer sa mga karne.
Bahad ni Merilles nga kon subli kini nga masakpan nga suway mopalusot nga walay insakto nga dokumento hayan dili lang pagkompiskar sa mga karne ang himuon, kon dili mapasakaan na kini og kaso og posible nga matangtangan kini og permit diha sa ilang pagbaligya sa merkado.
“Dili man ni siya pirme nila nga buhaton, ang ila is tan-awon nila nga naay time, magtuo sila nga luag og inspection, so they are taking chances bah. So hopefully this will serves as a warning to others even we are businessman, we also have an obligation to our consumers. Number one, the quality of product that we are serving. We should handle it properly. And also for the consumers, make sure that make it a habit to check the meat inspection certificate along with the product, so that they will know how legitimate the supplies are and how safe the meat are,” pahinumdom ni Merilles.