HAPIT na magsugod ang panahon sa kampanya sa lokal nga posisyon. Naghinamhinam na ang modagan gikan sa pagka-kongresista ngadto sa g
obernador ug konsehal sa siyudad ug lungsod.
May mga lugar nga nagkainit kay hingpit nga magkalaban ang nidagan. Usa na diha sa probinsiya sa Davao del Norte. Duha ka haligi sa politika ang nagtigi pagka-kongresista samtang kusgan sab ang nihagit sa kasamtangang administrasyon.
Mao pod ang Davao del Sur. Niharong ang mga sakop sa Hugpong ng Pagbabago sa maong probinsiya batok sa naglingkod nga administrasyon karon.
Ang nakabibo lang kay dala nila ang bendisyon sa anak sa presidente samtang ang kasamtangang administrasyon gisuportahan sa amahan ug sa gisabak nga partido niini.
Walay problema sa dakbayan sa Davao kay ang mga anak sa presidente gihapon ang klarong morenda sa sunod nga tulo ka tuig. Medyo sadya lang tungod kay daghang mga kapitan sa barangay ang nanagan. May nagsulti nga pamaagi daw kini sa Mayor aron bungkagon ang kamada sa karaang Hugpong sa Tawong Lungsod sa iyang amahan ug ilisdan sa iyang kaugalingong partido.
Walay kurat sa mga kapitan kay kung dili sila palaran nga modaug, makabalik man gihapon sila sa ilang karaang puwesto. Ang makuhaan og boto mao ang mga kasamtangang konsehal. Daghan ra ba kanila last termer ug ang ilang asawa, anak o paryente ang gipadagan. Makita gayud nato ang katag sa umaabot nga mga adlaw.
Sa laing bahin pagasaulogon ugma ang importanteng tradisyon sa mga Kristiyano ug sa simbahan nga gitawag og Miyerkules sa Badlis o "Ash Wednesday." Timaan kini nga misulod na kita sa 40 ka adlaw nga panahon sa kuwaresma o "Lenten Season" diin atong gihandom ang pag-antos, pagkamatay ug pagkabanhaw sa atong Manunubos mga 2,000 na ka katuigan nga nilabay.
Ang Miyerkules sa Badlis diin iduhig sa pari sa atong agtang ang abo sa gisunog nga lukay sa niaging kuwaresma nagtimaan sa atong kahuyang, pagkawalay bili, ug pagbalik nato ngadto sa abo human sa atong hinulamang kinabuhi.
Sama sa kanta sa Asin nga "Tuldok," abog lang kita nga maanod sa hangin niining kalibutan busa wad-on nato ang pagkagarbuso tungod sa bahandi ug gahum kay sa pag-abot sa panahon mobalik ra kita gihapon sa abog nga atong gigikanan.
Ug speaking sa abog, mograbe pa ang paglupad sa abog ug kainit sa adlaw sa umaabot nga mga semana tungod sa El Niño. Dugay-dugay na nga wala kita duawa og ulan.
Katingad-an kini nga panghitabo sa kinaiyahan o "climate change" nga magdala'g kainit sa usa ka lugar ug grabeng ulan sa pikas lugar.
Pipila lang ka tuig nga nilabay nga daghang probinsiya sa nasud nga nagdeklara og "state of calamity" tungod sa hulaw. Binilyon nga balor sa tanum sa kaumahan ang nadaut tungod niini.
Busa mangandam kita niini ug dili mag-usik-usik og tubig. Magdala kanunay og tubig mainom ug payong kay modulot ra ba sa unod sa panit ang kainit.