MAG-ATUBANG og kasong kalapasan sa Republic Act (RA) 10591 kun illegal possession of firearms and ammunition apil na ang Omnibus election code o gun ban ang usa ka kapitan sa barangay ug ang iyang tanod.
Ang duruha nasikop atol sa pagpatuman sa otoridad og search warrant nga gipagula sa korte Biyernes sa gabii, Pebrero 28, didto sa Barangay Mabantao, Kapalong, Davao del Norte.
Si Police Brigadier General Marcelo Morales, ang regional director sa kapulisan sa Davao Region, nag-ila sa dinakpan nga si Edgar Allan Valdez Quilla, hamtong ang pangidaron, kapitan sa Barangay Mabantao, sa Kapalong.
Ang search warrant gipagula sa Regional Trial Court (RTC) Branch 2 sa siyudad sa Tagum.
Narekober sa balay sa maong barangay kapitan ang usa ka caliber 45 MK IV, usa ka caliber 45 Norinco 1911, unom ka magazine sa caliber 45 ingon man 47 ka mga bala alang sa maong mga armas.
Nakuha sab sa posisyon sa kapitan ang 45 ka mga bala alang sa 9mm nga pistola, tulo ka bala alang sa caliber 38 nga revolver, upat ka bala alang sa caliber 22, ug usa ka bala sa calibre 380.
Gidakop sab sa otoridad ang usa ka Rolando Sombilon Pamat, 44, usa ka barangay tanod nga anaa sa lugar dihang gipatuman ang search warrant, gumikan nakuhaan usab kini og usa ka .38 revolver nga dunay unom ka mga bala.
Gipasalig karon ni Morales nga magpadayon ang ilang pagpaningkamot aron masiguro ang kahapsay sa eleksyon karong Mayo 2019 dinhi sa Davao Region.