GIPASALIG ni International Boxing Federation (IBF) middleweight champion American Daniel Jacobs nga makugang si Mexican Canelo Alvarez sa gikaintapan nilang unification bout karong Mayo 14 sa T-Mobile Arena sa Las Vegas, USA.
Nagkanayon si Jacobs nga sukad masukad, wala na nakasugat og kontra si Alvarez nga adunay sama kaniya og kapabilidad.
“He has not faced anyone like me either. I am a strong fighter who knows how to come forward, go back if necessary, I am a born counter-puncher and I know how to adapt to any situation... if he goes fast, if he comes in to move, to come forward, I can adapt to any situation and take it in my favor,” matod ni Jacobs sa interbyu sa www.boxingscene.com.
Si Jacobs adunay 35-2, 29KOs nga rekord, samtang si Alvarez, kinsa mosugal sa iyang World Boxing Council (WBC) ug World Boxing Association (WBA) midllweight titles ning awaya, naghupot og 51-1, 35KOs nga baraha.
Giangkon ni Alvarez nga dili bastabasta ang abilidad ni Jacobs apan dako ang iyang pagsalig nga molampos ning sangkaa. (ESL)