GIAWHAG ang tanang mga 21 anyos paubos nga basketball players nga musalmot sa labing unang Lapu-Lapu 3x3 Basketball Tournament karong Abril sa dakbayan sa Lapu-Lapu.
Walay height limit sa maong tournament ug gitugutan ra ang mga varsity players nga makaapil apan gikinahanglan nga dili sila lakip sa mga Cesafi teams o uban pang mga dagko o high-level nga liga sulod o gawas sa Sugbo.
“Kini atong tournament alang kini sa mga kabatan-onan nga hilig og basketball. Gidili lang nato ang mga varsity players sa mga major o high-level nga liga aron mabalanse sab ang kompetisyon. Ibutang man nila sa registration form kung asa sila nagduwa, pwede na nato ma-review,” sigon ni Nicko Tubo, ang organizer sa Lapu-Lapu 3x3 Basketball Tournament.
Lakip sab sa ginadili mao ang mga paid-to-play players.
Ang registration fee nagkantidad og P450 per head ug gikinahanglan adunay lima ka players matag team. Ang team na sab ang bahala sa disenyo ug pagpatahi sa uniform.
Adunay nagpaabot nga cash nga premyo ug trophies alang sa mga mananaog.
Bisitaha ang www.facebook.com/lapulapu3x3 alang sa dugang kasayuran. (PR)