SA PAGPUYO nimo dinhi sa kalibotan, usahay makapangutana ka sa Ginuo, “Nganong ako man?” Nganong ako ang Imong gipili?”
Usahay dili nimo kini masabtan diha-diha kay molabay pa ang katuigan sa dili pa nimo mahibaw-an ang katuyoan sa Diyos alang nimo.
Sama kini sa kaagi ni Candice Grace Cabras-Maque, maestra sa Pook National High School, dakbayan sa Talisay.
Sa dihang nag-edad siya og 25, gihimugso niya ang ikaduhang anak nila sa iyang bana nga si Jerry Maque, si Jerry II “JJ” Maque, pinaagi sa Cesarean delivery.
Sukwahi sa ubang mga inahan nga malipay makakita sa ilang bag-ong natawo nga anak, si Candice nakugang ug naglagot.
“Niligid gud ko sa nursery pagkahibawo nako. As in, mura gyud nahugno ang akong kalibotan. Grabe to nga emotion kay ako may una nga murag nag-suspect ba nga naay something wrong,” paambit sa 35 anyos nga inahan.
Si JJ natawo nga may Down Syndrome. Nakit-an ni Candice nga usa lang ang linya sa palad sa mga kamot sa bata o simian crease.
Tungod niini, ang inahan niagi og depression, gi-isolate ang iyang kaugalingon ug nikwestyon sa Ginuo kon nganong siya man.
“Nikwestyon gyud ko Niya sa ibabaw nga of all, ako jud ang Imong gipili nga inganion? Capable ba ko? Naa ba ko’y capacity nga mo-take care og ingani nga bata, sa unsay future? Daghan kaayo ko og gi-worry,” sugilon ni Candice sa Superbalita Cebu.
Apan luyo niini, nabati niya nga wa sila pasagdi sa Ginuo. Nakakita sila og support group, ang Down Syndrome Association of the Philippines-Cebu Chapter nga gipangulohan ni Ma. Cecilia Urbina, nga maoy nanawag ug ni-connect ni Candice ngadto sa laing inahan nga duna usab anak nga sama ni JJ.
Sa pag-apil ni Candice sa grupo, iyang nakita kon unsa kamahal ug kapinangga sa mga ginikanan ang ilang mga anak nga dunay Down Syndrome.
Nakatabang usab og hupay sa gibati niini ang article nga iyang nabasahan sa internet nga sinuwat sa usa ka inahan nga duna usab anak nga may Down Syndrome.
Apan wala matapos dinhi ang pagsuway sa pamilyang Maque, gumikan kay wala i-renew sa usa ka pribadong tunghaan ang kontrata ni Candice gumikan kay masakiton ang anak.
Sa kadaghan sa trabaho nga siya ni-apply, wa usab siya dawata.
Nag-atubang usab og krisis sa panalapi ang ilang pamilya kay magsud ug gawas sa ospital si JJ gikan sa pagkatawo hangtod nga nag-edad kini og 5 tungod sa pagkamasakiton niini ug ang inahan way trabaho.
Si JJ natawo nga dunay buslot ang iyang kasingkasing. Pagkatawo usab niini, kini nagka-sepsis ug nagka-meningitis ug may congenital pneumonia.
“Gisugsog na jud mi og maayo. Ang among bills pwerte dakoa. Wa mi kahibawo unsaon namo pag-survive. Wa mi kahibawo asa mi mangita og means,” dugang asoy ni Candice.
Apan bisan sa mga pagsuway, nahimong positibo ang panglantaw ni Candice sa kinabuhi ug sa iyang pamilya ug nakat-onan niini ang pagdawat ni JJ.
“Naa sad mi ma-meet buotan nga mga doctor. He (Ginuo) really finds ways gyud, motuo gyud ko ana,” pamulong ni Candice.
Gumikan sa iyang mga naagian, si Candice nahimong dangpanan sa mga ginikanan nga duna usab mga anak nga may Down Syndrome ug iya kining gipaambitan sa iyang mga nakat-unan ug sa mga butang nga iyang gipangbuhat pinaagi sa iyang gisuwat nga libro.
Pangandoy niini nga dunay libre nga therapy ang gobiyerno alang sa mga bata nga dunay espesyal nga panginahanglan.
Si JJ nagtungha karon sa Tutelage Learning Center sa lungsod sa Minglanilla ubos sa inclusive education ug kabahin sa iyang adbokasiya sa awareness sa Down Syndrome, gipang-post ni Candice sa iyang Facebook account ang kalampusan ni JJ ug sa mga bata nga dunay Down Syndrome.
“I wanted to show to them ba nga there’s actually beauty in having a child with special needs...Ayaw kabalaka kay Mama will really do my best gyud to make this place gyud at least comfortable ka. Precious kaayo ni si JJ,” panapos nga pahayag ni Candice.
Sa matag Marso 21 sa tuig, i-observe ang World Down Syndrome Day uban sa nagkutay nga mga kalihokan sa lainlaing bahin sa kalibotan. (SCG)