WAY igong basehan ang pangankon niadtong 11 anyos nga tinun-an sa Pajac Elementary School, Lapu-Lapu City kinsa mibutyag nga suway siyang gidagit niadtong tawo nga luwan sa puti nga van niadtong Pebrero 28.
Usa sa anggulo nga susihon sab sa kapulisan kon biktima sa momo challenge ang bata nga resulta sa posibleng pagtumo-tumo nga siya suway nga gi-kidnap.
Kini maoy giklaro ni Police Major Miguel Andeza, hepe sa Police Station 2 (Mactan) base sa ilang nagpadayon nga imbestigasyon human ilang gi-review ang kuha sa CCTV camera diha sa gawas nga bahin sa tunghaan.
Gisusi sa imbestigador ang oras nga maoy giingong adunay tawo nga miagni sa maong batang babaye nga mosakay sa puti nga van nianang 11:00 sa buntag.
Apan bugtong nakita sa CCTV mao ang pag-abot sa inahan sa bata nga naghatod sa iyang paniudto ug walay puti nga van ang mi-agi niadtong tungora sa maong oras.
Gawas pa, dili na usab makabutyag ang maong bata sa sakyanan nga giingong mihunong sa iyang atubangan sa gawas nga bahin sa ilang tunghaan sa dihang personal nga giduaw ni Andeza ang bata sa ilang pinuy-anan aron sa paghimo og follow-up.
“Kon sa una, van ang pangangkon sa bata karon nausab na matod pa nga puti nga sakyanan nga pangdatu,” sugilon ni Andeza base sa saysay sa menor de edad.
Gihulagway sa opisyal nga “inconsistent” ang pamahayag sa maong tinun-an.
Gisubay sab sa kapulisan ang dapit nga suway gi-kidnap ang maong bata diin adunay mga manindahay sa area apan wa sila namatikdan nga van sigun sa pangankon niini.
Nasuta nga adunay tablet ug cellular phone nga touchscreen ang 11-anyos ug matod pa kanunay kini magbabad sa paggamit sa maong mga gadget.
Mohangyo ang kapulisan ngadto sa ginikanan nga katugotan sila nga mosusi sa maong kahimanan aron masuta ang posibleng hinungdan nga daw nagtumo-tumo og estorya ang maong batang babaye.
Dako ang pagduda sa kapulisan nga posible nga nalukmay ang bata sa na-uso nga momo challenge sa mga kabataan diha sa online.
Ila usab irekomendar sa ginikanan nga ipahiling kini sa psychologist sanglit sila nagtuo nga aduna kini “trauma” gumikan sa kalit nga paghilak matag karon ug unya atol sa ilang pagsukit-sukit nga nakapahibulong sa imbestigador.
“Ang number one kani ato mga maestra nga dapat careful ta paghandle dili ta mo divulge dayon nga kidnapping or attempted kidnapping kung wa kay bases kay wa pa tay actual investigation. Mag-panic man gud maka create og kahadlok sa uban sama ra gihapon ni sa bomb joke,” tambag ni Andeza. (GCM)