NAUKAY karon ang mga Sugbuanon nga mga kompositor lakip na ang artists human mitingog na ang nagpasiugda sa Visayan Pop o mas naila nga Vispop sa nasod.
Pipila ka adlaw human pormal nga gipailaila sa publiko ang bag-ong Vispop 2019 nga gidala sa Artist Ko Multipurpose Cooperative, nitingog si Jude Gitamondoc, proponent sa Vispop kaniadto.
Sa iyang taas nga pamahayag pinaagi sa iyang Facebook account, si Gitamondoc nipakita sa mga pruweba diin 2008 pa dihang iyang plano nga palapdon ang dungog sa Vispop.
Tuig 2009 dihang nisulod kini sa Artist Ko Coop, apan tungod kay way igo nga pundo ang maong coop, wala kini mahinayon niadtong 2010.
Dihang nitunol og tabang ang Filipino Society of Composers, Authors and Publishers, Inc. (Filscap), sa 2013 nahimo ang unang Vispop Songwriting Contest.
Sulod sa lima ka tuig dihang milingkod si Gitamondoc sa Vispop ug sa 2017, nabutangan og lama ang relasyon niini sa Artist Ko tungod sa usa ka event unta niini sa Bohol nga gidala ang ngan nga Vispop.
“To fix the problem, they said, Artist Ko needs to wean itself from Vispop. They proposed we establish... Vispop, Inc. They offered me the position of general manager. Um, okay,” tipik sa pamahayag ni Gitamondoc.
Apan wa pa gani makadesisyon si Gitamondoc, nakurat siya nga na-reserve na sa Securities and Exchange Commission (SEC) ang ngan nga Vispop Inc.
“Mind you, this was the moment I betrayed them, according to them. Well, I’m sorry if they feel betrayed. But my loyalty is not with them, it is with Vispop,” matod sa post ni Gitamondoc.
Usa sa kontrobersiya nga iyang gibutyag sa iyang pamahayag kabahin sa royalties sa mga artist nga sugod palang 2013, daw wa na makadawat sa ilang bahin.
“So, if songwriters aren’t paid, and God forbid, coop members aren’t either, where is the money going?” matod ni Gitamondoc.
Sa panapos niini, gihulagway ni Gitamondoc nga ang Vispop alang sa tanang Bisaya artists ug di kini usa ka trademark.
“I know Vispop will always be a campaign and an advocacy.”
Gisuwayan pagkuha sa Superbalita Cebu ang habig sa Artist Ko, apan ning pagsuwat sa balita, wa pa kini makaluwat og pamahayag.