IKADUHA nga “kill list” nga naa ang mga ngan sa walo ka mga tawo, mayoriya niini naa ang mga kandidato sa pagkakonsehal ug barangay officials sa San Fernando, gipakatap sa mao nga lungsod.
Ang listahan, nga gikataho nga gipakatap pinaagi sa Facebook group page “Mga Estorya sa Politika sa San Fernando,” naay mga ngan sa gikatahong nalambigit sa illegal drugs.
Ang kill list nigawas dul-an sa duha ka mga buwan human upat ka public officials sa San Fernando gipatay sa managlahing mga insidente.
Ang upat pulos naa sa giingong una nga kill list.
Ang ikaduhang listahan nagtumbok kanila ni San Fernando Purok Federation President Filomeno Leyson; municipal councilor candidates Francisco “Ranie” Medicielo, Vidala Loguiber and Rely Enad; Barangay Cabatbatan chief Tommy Baclaan ug Barangay Greenhills chief Roven Borinaga.
Gawas kanila ni Leyson, Baclaan ug Borinaga, sila si Medicielo, Loguiber ug Enad naila nga mga kandidato ubos sa slate ni San Fernando Mayor Lakambini Reluya.
Anak nga babaye ni Loguiber nga si Jennifer, ug Richie Paul Manugas, lokal nga negusyante sa San Fernando, giapil sa listahan.
Tungod niini, upat ka mga grupo nagpatabang sa San Fernando Municipal Council aron pag-imbestigar niini.
Apan atol sa regular session sa Lunes, Marso 4, mga konsehal sa lungsod nga gipangulohan ni acting Vice Mayor Philipp Jude Medalla niawhag sa mga complainants sa pagpadangat niini ngadto sa mga awtoridad.
Sa ilang reklamo, mga sakop sa Pag-asa Youth Association of the Philippines (PYAP) San Fernando chapter, ang ABLE Citizens of San Fernando Association, Office of Senior Citizens Affairs (OSCA) sa lungsod ug local Purok Federation nag-awhag sa konseho sa pagsusi sa “dummy accounts” nga nagpakatap sa ikaduhang kill list.
Si Leyson, kinsa ginganlan sa listahan, niatubang usab sa konseho aron ipatawag si Neil Enriquez, kanhi konsehal sa lungsod ug municipal administrator sa panahon ni kanhi mayor Antonio Canoy, isip siya ang nailhang administrator sa Facebook page.
Matod ni Leyson nga ang kalambigitan ni Enriquez nagpasabot nga ang ikaduhang listahan hayan gipasiugdahan sa kritiko sa administrasyong Reluya.
Ang runningmate ni negusyante Ruben Feliciano nga si Canoy, higpit nga kaatbang ni Reluya sa nangaging eleksyon.
Nanghimakak si Leyson sa kalambigitan sa illegal drugs.
Nagpatabang na usab siya sa Cebu Provincial Police Office (CCPO). Si Medicielo, kinsa ginganlan sa listahan, niawhag sa mga reponsable sa paghuhunong na niini.
“Awhagon tamo, sa ngalan sa Ginoo, nga pangundang namo anang inyong gibuhat. Sahi pay kon kamoy matumngan, dili kaha mo moreklamo?” sulti ni Medicielo sa SunStar Cebu.