GIUNAY pagpatay sa iyang kauban ang usa ka gituohang sakop sa usa ka street gang pasado ala 1 kagahapon sa kaadlawon sa brgy. Lorega, dakbayan sa Sugbo.

Ang gipusil ug nakaangkon og usa ka samad pinusilan giilang mao si Leonil de la Cerna, alias Leonil, 24,nagpuyo sa maong lugar, sakop sa Bloods gang.

For updates from around the country, follow Sun.Star on Twitter

Ang gitumbok nga nagpusil kaniya nailhan sa ngalan nga “Crupper Milla,” iya ra usab nga silingan ug kauban sa gang.

Ang pasiuna nga imbestigasyon sa kapulisan nagbutyag nga nakit-an ang duruha nga may gilalisan sa dapit.

Wa magdugay, nakita na lang ang suspek nga nitalikod, apan mikalit og atubang sa biktima dungan sa pagbunot sa iyang gitakin nga armas ug gipusil ang biktima tumong sa dughan.

Natumba ang biktima sa dalan ug ang suspek daling nakasibat.

Ang mga silingan nidala sa biktima sa tambalanan, apan wa magdugay nakabsan kini sa iyang kinabuhi.

Gisubay pa sa pulis kon unsay motibo sa suspek ngano nga gipusil ang biktima.

Ang Bloods usa sa duha ka gikaintapan nga gangs dinhi sa Sugbo.

Ang ilang higpit nga kaaway mao ang Crips.

Ang duha ka mga gang nga dunay mga sakop sa hapit tanang barangay sa dakbayan sa Sugbo ug kanait nga mga dapit dako kaayong suliran sa kahusay ug kalinaw.

Kini tungod sa pagbinaslanay sa mga sakop sa duha ka mga grupo.Pipila na ka mga kinabuhi ang nangakalas tungod sa ilang kasungian. (JFT)