USA ba ka sa moduwa og Mobile Legends? Unya tungod kay na-adik ka na niini, bisan ga-charge duwa gihapon? o dili kaha, nag-Facebook ug nalimtang na ang linung-ag?
Mao kini ang mga sitwasyon nga posibling rason sa pag-ulbo sa sunog ug kabahin sa pahimangno sa Bureau of Fire Protection (BFP) 7 sa publiko sa Fire Prevention Month.
Tungod sa nagkadaghang naboang sa bag-ong teknolohiya susama sa online games ug social mediam niawhag ang pangulo sa Safety Enforcement Division sa BFP 7 Chief Insp. Josephus Alburo sa mahilig niini nga magmatngon.
“Pahimangno nato sa publiko atoang usage sa online, cautious ta, i maximize nato kay daghan kaayo ron kanang nabiyaan nga cellphone nga nag charge or gaduwa ga charge maka cause og sunog,” matod ni Alburo.
Dugang niya nga sagad sa madisgrasya kining tutok na kaayo sa online games ug wala na makabantay sa ilang linung-ag nga rason sa sunog.
“Kanang magsige ta og duwa, Mobile Legends, PUBG, daghan na kaayo ron ang tawo nga tutok ra permi ana niya ang giluto, ang gilung-ag biyaan, ang gisindihan nga sigarilyo biyaan,” si Alburo nagkanayon.
Pasabot ni Alburo nga kinahanglan nga responsable sa pagduwa niining online games o kaha paggamit sa social media aron dili moresulta sa aksidente susama sa sunog.
“Mo back to zero mo, magsige og focus sa online games niya mga buhat sa panimalay di ninyo mabantayan, kamo gihapon ang alkansi,” dason niya.