DUHA ka mga suspetsado sa pagpanulis ang nasikop sa kapulisan pinaagi sa tabang sa katawhan alas 2:00 sa kaadlawon Martes, Marso 5, diha sa Capistrano-Hayes Streets, Barangay 2 siyudad sa Cagayan de Oro.
Ang mga suspetsado naila nga sila si Niko Acapulco, 19, ulitawo, taga Kamuning Street, Carmen ug ang kauban nga si Jerico Bulanday, 18, ulitawo nga taga Villa Verde, Balulang ning siyudad.
Sa nahipos nga impormasiyon gikan sa Police Station 1 (PS1) sa Divisoria gikabutyag nga samtang anaa sa maong dapit nagbaklay si Joey Mendoza, 20, ulitawo ug networking staff nga taga Dabatian Street, Carmen kalit lamang kining gitionan og kutsilyo ug gipugos sa pagkuha ang iyang bag.
Gisulayan pa kini sa pagdunggab apan swerteng napugngan niini ug nabira ang kutsilyo ug gani gisumbag pa kini hinungdan nga nakaangkon og bun-og lakip na usab samad sa iyang wala nga bahin sa mata.
Giingong nagpakitabang kini ug swerteng girespondehan usab sa mga nagpakabanang katawhan hinungdan nga nasikop ang duha sa lima ka mga suspetsado.
Nakuha usab sa posisyon niini ang maong kutsilyo nga adunay gitas-on nga anaa sa mga unom ka pulgada.
Ang maong biktima ang daling gidala sa Northern Mindanao Medical Center aron nga daling matambalan samtang ang mga suspetsado ang kasamtangang anaa sa kapulisan aron sa pag-atubang sa ilang mga kaso nga posibleng ipasaka ngadto kanila.