USA ka 54 anyos nga lalake gikataho nga nilayat sa Mandaue-Mactan Bridge pasado alas 2 Martes sa hapon, sa habig sa dakbayan sa Mandaue.

Giila kini sa kapulisan sa Opao Police Station nga si Romeo P. Pernia, lumolupyo sa Barangay Maguikay sa mao nga dakbayan.

Siya nailhan human makuha ang identification card sa bulsa sa iyang maong nga short.

Gisulayan pa unta siya sa pagtabang sa mga tawo ug gidali sa pagdala sa tambalanan, apan gideklarar siya sa mga doktor nga dead on arrival.

Sutaon pa sa kapulisan kon nilayat ba siya sa taytayan nga iya lang o aduna bay foul play ang kamatayon.

Nakig-alayon na usab sila sa pamilya ni Pernia aron masayran kon duna ba siyay problema.