MAAYO ning tan-awon kon di ba supak sa Batakang Balaod kining Rice Tarrification Law. Giusab ang function sa National Food Authority (NFA) nga wa tanduga ang P.D. 4 nga naggama niini.
Gilangkat ang stabilization ug regulatory function sa NFA nga unta maoy lawas ug kalag niini. Sa ato pa gihimulbolan kini sa Rice Tarrification Law (RTL).
Ambot kon makahatag ba kinig kaayuhan nga daghan mag kasungian (inconsistencies) nga makalibog kon sabton. Kining free-for-all rice importation may tuyo pagpadagsang sa imported rice.
Kon modagsang unsay mahitabo sa mga farmers? Mokamang sila sa yuta. Kay wa nay mamalit sa ilang humay. Unya, naay P10 bilyon nga suporta kada tuig ubos sa Rice Competitiveness Enhancement program.
Ang linugdangan mag-away ang pribadong sektor ug mga mag-uuma. Tuod competitiveness in action nga ang mga konsumidor ang maapektuhan sa kapulihay.
Lain pa, mawagtang kuno ang kartel sa humay. Molig-og samot ang kartel hinuon kay ang rice-importation capital-intensive diin tapukon nila ang puhonan.
Ang rice traders mat-an pa sa pinya. Di ni sila magpatakag import kay kahibawo ni sila sa rice consumption statistics. Duna ni silay limitasyon. Modagsang diay ang imported rice?
Labi nang wa nay kalagdaan (regulations) mosalir samot ang tago-tago (hoarding) sa kaalautan sa katawhan. Kon way regulasyon gubot pa sa lukot ang rice trading.
Paghikit-an nako ang nasudnong kagutom. Aron mabuhi mangaon na lag yellow corn sama niadtong 60’s ug 70’s dinhi sa ato sa kapalpakan sa gobiyerno.
Kinahanglan ang Dept. of Trade & Industry (DTI) mosud dinhi gamit ang mga balaod (kon duna) sa rice trade. Aron paghumok sa ngil-ad nga impak sa RTL.
Motuo ko niining pagpalig-on sa panguma sa humay sa tininuod nga tabang sa kagamhanan sa modernong kahimanan, patubigan, patambok, binhi, pahuwam alang sa kalambuan sa umahan.
Apan pangutana: naa ba ang kamatinud-anon sa mga gisaligan sa kagamhanan ning bahina?