GIKAN sa Basilica Minore del Sto. Nino diin ako misimba ning hapon sa Dominggo, milahos ko sa Plaza Independencia aron ‘magpahayahay sa baga’ kay duol sa Fort San Pedro ug sa dagat. Samtang naglakaw-lakaw sulod sa plasa, nahiagian ko ang usa ka babaye nga naglingkod nga nag-inusara sa tumoy sa usa ka sementadong lingkuranan. Mihunong ko ug mitan-aw kaniya nga nagpahiyom. Nakaila ko niya. Klasmeyt ko siya sa hayiskol sa Abellana National School. Mibawos siya pagpahiyom. ‘Nakaila pa siya nako,’ matod ko sa hilom. Giduol ko siya.
“Pwede molingkod dire,” matod ko nga misenyas sa akong kamot sa pikas tumoy sa lingkuranan.
“Yes, of course!” Iningles nga tubag sa babaye. Taas ang iyang buhok nga nagdunghay kutob sa iyang mga abaga. Lamurok ang iyang mga aping ug taliwtiw ang iyang ilong.
“Di ba ikaw si Mitch?”
“Yes, Nganong nakaila ka nako?” sa babaye nga mitutok kanako. “It seems, wa ko kaila nimo.”
“Nakalimot ka? Ako si Erik. Klasmeyt ta sa hayiskol sa Abellana!” Gitutokan sab nako siya.
“I don’t seem to remember. Nus-a man ka ni-gradweyt sa Abellana? Taga Abellana pod baya ko,” ni Mitch.
“2009,” tubag ko.
“Di kita ka-batch. I graduated in 2012,” ni Mitch.
Nahibulong gyud ko kay siya man gyud si Mitch, ang akong klasmeyt. Bisan sa iyang panlihok-lihok ug tuno sa sinultihan. Hasta ang pagkiwi sa mga ngabil kon siya mopahiyom. Nagtuo ko nga nagtiaw ra siya, kay may pagka siaw man si Mitch.
“Ayaw ganig pangomedya diha, Mitch!” Mingisi ko.
“I’m not joking, Erik. It’s true, we’re not classmates. I’m so sorry!”
Miyango-yango ko. Giingnan ko siya, “I’m sorry, too, for disturbing you!”
“It’s alright!” matod niya.
Unya may nahiabot nga usa ka ambungang lalake. Miduol kini sa among nahimutangan ni Mitch.
“Hai, Mitch! Ganina ra ka naghuwat dinhi?” timbaya sa lalake nga mipasiklap nako.
“Hai, Erik! Taudtaod na, Meet Erik, your namesake. Alumnus pod siya sa Abellana sama nato,” ni Mitch nga milingi nako. “Erik, imong sangay si Erik, my boyfriend!”
Gitunol ni Erik ang iyang tuong kamot ngari nako ug naglamanohay mi. Sulagma pod ba nga magkapareha ang among ngalan o latid sa among mga palad?
“Let’s go. I’ll take you home!” agda ni Erik kang Mitch.
Nahibilin ko sa sementadong lingkuranan. Nakapanglingo-lingo ko. Misantop sa akong hunahuna nga dinhi sa kalibutan sa mga tawo daghang kahibulongan nga dili matugkad sa kaalam sa tawo. Sama kang Mitch nga uyab ni Erik. Kaamgid o kamay-ong o look-alike gyud siya ni Mitch, ang akong klasmeyt sa hayiskol, nga nauyab sab nako kaniadto sa nagtungha pa mi sa Abellana. Hain na kaha siya karon? (KATAPUSAN)