MAGPA-bidding og balik ang City Environment and Natural Resources Office (Cenro) sa Bids and Awards Committee (BAC) sa kagamhanan sa siyudad sa Toledo alang sa katukoran sa duha ka leachate pond sa sanitary landfill sa Barangay Putingbato nga nagkantidad og P1.06 milyones.
Si Engr. Pilar Canga, officer-in-charge sa Cenro sa Toledo, nagduda nga gisakyan og pulitika ang isyu labot sa reklamo sa mga mag-uuma ug mga molupyo sa mga barangay Putingbato ug Canlumampao, Toledo, batok sa sanitary landfill nga naa sa Barangay Putingbato.
Apan wa niya nganli kon kinsa nga opisyal ang iyang gipasabot nga namulitika sa isyu.
Matod niya, iyang gipa-reprogram ang bidding kay way contractor nga nikuha sa proyekto tungod sa iyang pagtuo nga gigamyan sa presyo ug gilay-an sa lokasyon sa landfill.
“I hope you understand bitaw the process kay dili man ingana nga diretso lang. Ang bidding it would take sometime, kon way bidder, di ma-implement and we have to re-do everything again. Unya if we do shortcut, kami man sad sa BAC (ang manubag),” pasabot ni Canga.
Siya gipatawag sa usa ka technical conference sa buhatan sa EMB 7 pagka Martes, Marso 5, apan wa pasudla ang mga tigbalita.
Matod ni Canga nga duna nay gihimo ang iyang buhatan bahin sa reklamo sa mga mag-uuma.
Siya nipasabot gibutangan na nila og bio-enzymes ang landfill aron mawa ang baho sa mga basura samtang naghuwat nga duna nay mo-bid sa pagtukod og leachate pond.
Sumala niini naay leachate pond sa landfill nga maoy mosawo sa inagos nga tubig apan nabuak kini tungod kay nilihok ang yuta.
“Kanang bio-enzymes eco-friendly na siya nga mawa ang baho at the same time mawa ang color but it would take some time. Pero kon gibutang namo kay chlorine, mawa ang baho pero stinky then ang yuta dili na hinuon motubo kay ang chlorine chemical man,” dugang pagpasabot ni Canga.
Sa suwat ni Konsehal Shirly Canezres sa Barangay Canlumampao, chairman sa committee on environment, pinetsahan og Enero 8, 2019, siya nihangyo sa pangu sa DENR sa Toledo nga moduaw sa ilang lugar aron matan-aw ug masusi ang kahimtang sa katawhan ug mga mag-uuma. (SCG)