SUGOD nang mabati ang kainit sa panahon kay haduol na ang summer.
Apan atong nasayran gikan sa Philippine Atmospheric, Geophysical and Astronomical Services Administration (Pagasa) nga ang summer karon mosamot kainit ug kaigang gumikan kay makasinati kita og El Nino.
Ang epekto sa El Niño, di basta-basta gumikan kay mopauga kini sa daghang mga lugar nga mohatud ngadto sa pagkuwang unya sa produksiyon sa mga tanum sa kabasakan ug kabukiran.
Base sa atong kasinatian, lisud ang kahimtang kon ig-on kita sa huwaw. Gani karon, nag-abiso na ang Pagasa nga dunay daghan pang mga lugar sa nasud ang maigo sa huwaw.
Sa kasamtangan, nakasinati na og grabeng kainit ang Ilocos Norte, Zamboanga del Sur, Zamboanga Sibugay, pipila ka bahin sa Maguindanao Province ug sa Cebu.
Bisan gani dinhi sa siyudad sa Davao, namatikdan na nato nga nagsige ang init. Bisan tuod kon dunay giulan nga pipila ka bahin sa siyudad kagahapon, apan di kini garantiya nga magpadayon ang maong kahimtang.
Di lang mga tanum ang nauga ning panahona, bisan mga sagbot nga peligro sa mga sunog kay dali na lang mosilaob og malabayan og mga upos sa sigarilyo.
Busa angay lang kitang magbantay kanunay ilabi na sa sunog, ilabi na ning mga uwahing mga semana nga nakasinati kita og sunod-sunod nga pag-ulbo sa sunog sa dakbayan.
Ang pagsaulog sa Fire Prevention Month ning panahona maghatag kanato og pahimangno nga kanunay magbantay aron nga malikayan ang sunog.