KANHI nasikop sa pagpamaligya og ecstasy gi-ambush patay sa duha ka mga tawo nga nag-angkasay sa motorsiklo sa may dalan M.C Briones, Barangay Guizo, Dakbayan sa Mandaue, pasado alas 12, Miyerkules sa udto, Marso 6.

Gikan sa hearing sa iyang kaso sa pagpamaligya og drugas si Neil Benjamin Eugenio Yap, 34, taga Barangay Quiot Pardo, Dakbayan sa Sugbo.

Si Yap naapil sa ecstasy matrix sa Police Regional Office (PRO) 7.

Matod ni Major Aldrin Villacampa, hepe sa Centro Police Station, ilang nadawat ang alarma sa pagpamusil, alas 12:15 sa udto.

Si Yap nagmaneho sa blue nga awto (ABN 4011M) gikan nitambong sa pagdungog sa iyang kaso sa Regional Trial Court 7, Branch 83 sa Mandaue City.

Ang sakyanan ni Yap nga anaa na sa tunga-tunga nga dalan sa MC Briones nagpaatubang sa amihanan sa dakbayan sa Mandaue.

Base sa inisyal nga pakisusi, duha ka mga lalake nga naka-full-face helmet sakay sa itom nga motorsiklo ang namusil kang Yap dihang padulong na mo- go ang signal sa traffic light.

Nagkadaiyang samad pinusilan sa lawas ang naangkon ni Yap.

Duna siyay igo sa nawong ulo ug liog nga hinungdan sa hinanali nga kamatayon.

Pipila ka mga kabhang sa mga bala nga iya sa .45 kalibre nga pistola nagpasad usab sa dalan.

MOTIBO

Dugang ni Villacampa nga usa sa ilang gisunod nga motibo ang kaso may labot sa party drugs.

Human nga kini ang gitudlo niadtong nasikop nga negosyante nga si Roderick Ngo Go, nga si Yap ang supplier sa party drugs sama sa ecstasy.

Sila si Yap ug Go nasikop niadtong Enero sa miaging tuig sa R Suites Cafe sa Barangay Alang-alang sa Dakbayan sa Mandaue.

Ang establisemento gipanag-iya ni Go.

Laing sutaon ang personal nga kaligutgot o may kalambigitan sa negusyo.

Gisusi usab ang mga CCTV footage diha sa dan gikan sa korte hangtod sa crime scene kon aduna bay naka-capture sa panghitabo o kon gisundan ba ang biktima.

DRUG MATRIX

Giangkon sa Mandaue City Police Office director, Police Colonel Julian Entoma, nga base sa ilang pag-background check kang Yap, siya anaa sa ecstasy matrix sa PRO 7.

Siya ang gitumbok nga maoy tigdawat sa mga party drugs gikan sa tinubdan sa gawas sa Sugbo.

Giingon nga siya ang moapud-apud sa ubang mamaligyaay ug manggamitay sa party drugs sa Sugbo.

Usa sa ilang sutaon kon kanus-a nakaangkon sa temporaryo nga kagawasan si Yap.

Unta silang duha ni Go gipasakaan sa Regional Special Operations Group (RSOG-7) sa niaging tuig og kasong pagpamaligya og ecstasy pills.

Ang drugas gidili ubos sa Republic Act 9165 o Comprehensive Dangerous Drugs Act of 2002.

Gipasabot ni Entoma nga posibleng bailable ang kanhi kaso niini human nga wa pa malakip kon pila ang gibug-aton sa ecstasy nga nakuha gikan kang Yap kaniadto.