LAYO pa gani ang away apan nalantawan nang daan nga mapiling “Fight of the Year” ang umaabot nga unification bout nila ni Mexican Canelo Alvarez (50-1-2, 34 KOs) ug American Daniel “Miracle Man” Jacobs (35-2, 29 KOs).
Si Alvarez mosugal sa iyang World Boxing Council (WBC) ug World Boxing Association (WBA) middleweight titles alang sa International Boxing Federation (IBF) middleweight belt ni Jacobs karong Mayo 4 sa T-Mobile Arena sa Las Vegas, USA.
Nagkanayon si Golden Boy Promotions CEO Oscar De La Hoya, kinsa maoy promoter ni Alvarez, nga hugot ang iyang pagtuo nga grebeng binukbokay ang mahitabo ning awaya.
“I guarantee this is going to be the fight of the year. You have two fighters who don’t have a quit in their game, this is a fight for the ages. The fact that Jacobs and Canelo both want to be great, there’s no other way than to make this one great for the fans, they will get their money’s worth come May 4,” matod ni De La Hoya sa interbyu sa www.boxingscene.com.
Gipasabot ni De La Hoya nga sila si Alvarez ug Jacobs nahilakip sa labing madasigong mga boksidor sa kasaysayan sa boksing hinungdan nga pareho kining dili kahibalo moatras sa bisan unsang lisod nga pagsuway. (AFP, ESL)