DUNAY panultion sa Iningles nga, “Spare the rod, spoil the child.” Gikan kini sa balak nga “Hudibras” ni Samuel Butler. Susama kini sa Proverbs 13:24 King James version, “He that spareth his rod hateth his son: But he who loves him chasteneth him betimes.” Ug sa New Living Translation, “Those who spare the rod of discipline hate their children. Those who love their children care enough to discipline them.”
Makita nato dinhi nga ang bunal gigamit sa pagdisiplina sa kabataan, di sa pagdagmal kanila. Gihisgotan nato kini tungod kay gi-veto ni Presidente Rodrigo Duterte niadtong Pebrero 23 ang Positive and Non-Violent Discipline of Children Act, ang balaudnon nga magdili unta sa mga ginikanan sa paggamit sa corporal punishment sa pagdisiplina sa ilang mga anak.
Gidili sa maong balaudnon ang pagpatid, pagbunal, pagsagpa, pagbalikas ug pagpakauwaw sa bata atubangan sa publiko. Sa iyang veto message, ang Presidente niingon nga mahimong gamiton ang pinugngan nga corporal punishment aron maoy mahinumdoman sa bata nga di kini buhat sa kasuko ug abuso, kon di, buhat sa gugma aron pagdisiplina kaniya alang sa iyang kaayohan.
“I believe as much as Congress does that every child should be protected from humiliating forms of punishment. It is a salutary piece of legislation. However, I am gravely concerned that the bill goes much further than this act as it would proscribe all forms of corporal punishment, humiliating or not, including those done within the confines of the family home. I do not share such an overly sweeping condemnation of the practice,” matod pa niya.
Si Cebu Vice Gov. Agnes Magpale, pangulo sa Provincial Council for the Welfare of Children, niingon nga andam siya nga mohatag og chance sa desisyon sa pangulo ug mosunod sa balaod.
Samtang si Cebu Gov. Hilario Davide III niingon nga aduna nay mga balaod nga nanalipod sa kababyen-an ug kabataan sama sa Republic Act 9262, ang Anti-Violence Against Women and their Children Act of 2004, nga nagprotektar kanila sa physical and psychological violence.
Ang pagdili sa corporal punishment gisundog sa atong mga magbabalaod sa mga balaod sa Estados Unidos ug uban pa. Ang pangulo niiningon nga kinahanglang pagabatukan kini.
Busa angay nga magmatngon kadtong mga batang badlungon. Pagkadaghan ra ba sa mahimong bunal, gikan sa silhig, kiwis-kiwis sa kawayan, sanga sa bayabas ug sambag, pal-ak sa dahon sa iba ug uban pa. Ayaw lang nang latigo sa kabayo ug ikog sa pagi kay klarong abuso na gyud na. Seguro na gyud nga makiha ang mga ginikanan sa RA 9262. (edbarrita@gmail.com)