MIPADAYAG sa ilang kahingawa ug kabalaka ang pipila ka mga piniling opisyal sa lungsod sa San Fernando kabahin niining ikaduhang listahan sa mga patyonon sa maong lungsod. Ubay-ubay na nga mga opisyal sa maong lungsod ang misteryosong gipamatay. Ang katapusang mao si Konsehal Alfonso Donaire IV, kinsa didto gipusil-patay sa lungsod sa Ramon Magsaysay sa Zamboanga del Sur, sunod nila ni Konsehal Alexander Alicaway ug Reneboy Dacalos, Magsico Barangay Captain Johnny Arriesgado.
Mikatap ang ikaduhang listahan pinaagi sa social media pinaagi sa Facebook account “Mga estorya sa pulitika sa San Fernando.” Ambot og si kinsa ang mga responsable niini. Gihinganlan ang mga targitonon lakip sa magpapili karong umaabot nga eleksiyon. Nabalaka ang mga anaa sa listahan.
Tinuod man o dili, gikinahanglan nga tutukan kini sa kapulisan kay kabahin man kini sa peace and order matter. Unya dili lang usab dayon kini nila isalindot kay aduna na may mga nahitabo sa maong lungsod. Asa man ka mangita ana nga upat na sa ilang mga opisyal ang gipatay. Ang pinaka-grabe mao ang pag-ambush sa magtiayong Reluya diin samdan si Mayor Lakambini “Neneth” Reluya ug napatay ang iyang bana nga si ABC federation president Ricardo “Nonoy” Reluya.
Kon atong tuohan ang uban, drugas maoy hinungdan kay ang sagad gipamatay nga mga opisyal adunay koneksiyon sa self-confessed druglord nga si Franz Sabalones. Sa kaso sa mga Reluya, dako ang posibilidad nga pulitika ang motibo apan wala pay matumbok nga mastermind. Una nang gipanghimakak ni Ruben Feliciano, kaatbang ni Reluya sa pagka-mayor, ang iyang kalambigitan. Gani iyang gipun-an ug P2.5 milyones nga unang P2.2 milyones nga gitanyag ni Reluya isip reward money alang sa makahatag og inpormasyon sa mastermind.
Nagtuo ko nga mas mo-grabe pa ni. Mas maayo tun-an kini pag-ayo sa kapulisan ug sa Comelec kon angayan bang ipa-ubos ang lungsod sa Comelec control. Kanus-a pa man diay ta managang o manguros inig ma-igo na sa kilat? (bobbygnalzaro@gmail.com)