GIILA ang kababaehan nga weaker sex, gani man wala kaayo sila mahatagan og igong pagtagad sa mga sugilanon sa Bibliya sukad pa sa pagsugod sa kalibutan.
Ang sugilanon nagsulti nga gikuha si Eva gikan sa wala nga gusok ni Adam aron dunay iyang ikauban ug katabang didto sa tanaman sa Eden.
Nahimo ang babaye nga instrumento sa pagkahulog sa kalibutan sa sala hinungdan sa kasakit nga naambitan sa tanang kaliwatan hangtud sa atong kapanahonan.
Sa modernong kapanahonan naningkamot ang kababaehan nga mapakita ang ilang katakus ug makabaton sa katungod sama sa ginabatnan sa mga kalalakihan aron pamatud-an nga ang kaya sa mga lalaki, kaya sab sa mga babaye.
Sa atong panahon daghan na nga mga babaye ang nagabuhat sa mga buluhaton nga angay unta buhaton sa mga lalaki. Dunay atong nahibaloan nga mga asawa maoy nagatrabaho alang sa pagbuhi sa pamilya samtang ang mga bana nga ginaingon nga haligi sa pamilya mao nay nagabuhat sa mga buluhaton unta sa asawa.
Dunay uban nga daw ginapakaubos ang pagtan-aw sa papel sa usa ka asawa kay kon magkatagbo ug mag-istoryahay, daw ila pa nga ikaulaw nga sila asawa lang, walay trabaho kay naa lang sa balay.
Kon magpasuweldo ang asawa bayad sa iyang mga trabaho sulod sa panimalay, pila kaha ang angay ibayad sa bana bugti sa iyang mga paghago? Dili lalim ang trabaho sulod ug gawas sa balay nga ginabuhat sa asawa.
Siyam ka bulan ang pagsabak hangtud ikahimugso ang bata. Ang pag-utong panahon sa pagpanganak diin ginaingon nga naglatay sa lanot ang kinabuhi sa inahan, ang pagsakripisyo sa pag-atiman ug pagpadako sa bata apil ang pagbilar panahon nga magkasakit, usa sa sagad mosangko sa lalis sa magtiayon, apan ang asawa sagad mag-aguwanta tungod sa gugma ngadto sa anak.
Pila man ang dapat imong ibayad sa imong asawa kon pabayran pa ang iyang serbisyo sa panimalay matag adlaw, kinsinas o binulan?
Tungod sa kadaghang buluhaton sa balay ang mga asawa magkagidlay kay kanunay kulang ang panahon pag-atiman sa kaugalingon tungod sa kadaghan sa trabahuon sa balay.
Walay labot sa atong paghisgot ang mga magsige'g panumbalay kay makig-tsismis sa silingan.
Ubang mga bana masuko, mangulata kay walay linung-ag pagpauli sa balay, dili man lang makapangutana ug makatan-aw unsay mga gibuhat sa asawa nga maoy nabilin sa balay. Kon ang bana nagtrabaho mao lang ang iyang ginaatubang samtang ang asawa nagabantay og bata samtang nagtak-ang og linung-ag ug nagalaba. Daw sayon tan-awon ang trabaho sa balay apan dili lalim kon ikaw ang magbuhat.
Kon atong lantawon ang kalampusan nga nakab-ot sa mga anak sa ilang kinabuhi atong maaninaw ang sakripisyo sa mga inahan gikan sa pagsabak ug pagmatuto sa kabataan.
Kon ikaw usa ka matinud-anon nga inahan, saludo ko sa inyo ug angay kamo pasidunggan apan kon mapasagaron ka, pagtuon kay dili paulahi ang tanan.
Sa mga bana, unsa man nga pagdayeg o pagpasalamat nga imong gikahatag sa imong kapikas sa mga katuigan nga kamo nagkauban? Duna bay appreciation o pulong sa pasalamat ang imong nabuhat labi na nga karon ginasaulog ang bulan sa kababaehan?
Sa mga kababaehan nga angay dayegon, akong ginatunol ang akong pagyukbo uban sa pag-ingon, "More power" sa kababaehan!