MAGPATUNGA si Konsehal Dave Tumulak, chairman sa public order and safety sa Cebu City council, sa kasungian sa pagtukod og police station sa Barangay Inayawan, dakbayan sa Sugbo.
Matod ni Tumulak, iyang hangyuon si Kapitan Kirk Bryan Repollo ug Brigader General Debold Sinas, diektor sa Police Regional Office (PRO) 7, nga mag-estoryahanay aron masulbad ang isyu.
“As much as possible maninglamot ko kutob sa akong mahimo nga magka-estorya silang duha, maabot lang sila in one table para magdiscuss. Dili nalang ta anang kasokaso kay lain kaayo tan-awon,” padayag ni Tumulak.
Gihulagway niya nga dili maayong tan awon sa publiko nga mag-away ang duha ka public servant sanglit ang malipay niini mao kadtong mga ilegalista.
MOKIHA NI SINAS
Si Repollo unang nipadayag nga mopasaka og kasong oral defamation batok kang Sinas may labot sa pagkasakmit sa 18 kilos nga shabu o sa Inayawan ug lakip sa ipasakaan og kasong cyber libel si Konsehal Joel Garganera, chairman sa police advisory council.
Gialegar ni Repollo ang kapulisan nga wala mosuporta sa administrasyon ni Mayor Tomas Osmeña hinungdan nga gipanggukod ang mga kapitan nga kaalyado sa mayor.
Iyang gihimo nga sanglitanan ang kapitan sa Barangay Lusaran ug Calamba nga pulos napriso apan nakagawas na kay gi-raid ang ilang mga balay ug nakuhaan og armas.
WAY INTEL BUDGET
Samtang, ang hepe sa kapulisan sa sIyudad niangkon nga wala silay budget sa intelligence fund sukwahi sa pangutana ni Repollo kung asa gigamit ang intelligence fund sa PNP labot sa pagpaniid sa mga nalambigit sa ilegal nga drugas.
Sa press conference nga gipatawag ni Repollo, iyang gisaway nga hagbong ang intelligence monitoring sa PRO 7 nga maoy hinungdan nga nakaabot sa iyang barangay ang 18 kilos nga shabu.
Nakapangutana pa kini kung giunsa paggasto ang intelligence fund nga gi hatag kanila sa gobyerno.
Apan, nihimakak si Police Colonel Royina Garma, hepe sa Cebu City Police Office (CCPO), nga huyang ang ilang intelligence monitoring huan sa malampuson pagdakop sa mga dagkong drug player nga nagsugod lang sa duha ka kilos.
Matod ni Col. Garma nga ang CCPO wala makadawat og intelligence fund gikan sa PNP ug sa kagamhanan sa siyudad
Ang ilang gigamit nga pundo mao ang Maintenance and Other Operating Expenses MOOE gikan sa PRO 7, dugang ni Col. Garma.
“Buti pa si Kap may alam. Kap pa-share naman baka nabigyan ka ng intel fund sa barangay level. Wala nga kaming natanggap sa intel sa barangay captain wala man, bihira. konti lang, usually concerned citizen sa barangay nila ang nag bigay na di nila type yung barangay captain kase walang ginagawa,” matod ni Col. Garma.
Ang g-itext sa itug-an ni CD pulos reklamo nga, matod pa, nahibawo na ang barangay labot sa problema sa ilegal nga drugas apan wala kini gihimo nga lakang.
CRITICAL AREA
Gihulagway ni Col. Garma nga usa ka critical area angy Inayawan tungod kay duol ra kini sa Tanke sa sIyudad sa Talisay nga na bungkag human sa subsob nga kampanya sa kapulisan.
Ang Inayawan maoy daling mabalhinan sa nilayas nga drug personalities sa Talisay nga hinungdan nga kinahanglan na nga matukod ang estasyon sa pulis sa maong barangay, dason ni Garma.
PULITIKA?
Awhag niya kang kapitan Repollo nga dili na sagulan og politika ang isyu sa building sanglit mahimo ra kini nga sabutan sa malinawon nga paagi alang sa katawhan sa ilang barangay.
Natingala si Garma nganong nagmagahi ang kapitan nga matukod ang building nga posibling aduna kini agenda sa maong luna.
“Basta may nag text kase sa akin wala daw maparkingan daw yung nagbebenta ng catering. Wala na daw madaanan ang catering. Actually yan din ang sinabi nya sa akin ng nag-usap kami dito eh, problema din daw nya kung ilagay nya ang police station daw duon wala na daw madaanan yung catering,” matod ni Col. Garma.
Ug sukwahi sa pangangkon ni Repollo, si Col Garma niingon nga dunay pirma sa tanang konsehal sa miaging administrasyon sa Inawayan ang deed of donation sa luna nga tukuran sa police station.
Dugang ni Col. Garma, kon malangay pa gyud ang pagtukod sa police station, ang pundo niini mabalik sa nasudnong panudlanan samtang lisod ang laing luna nga gitanyag ni Repollo human duna pay gub-on nga edipisyo ug magkuwang na ang ilang budget.
Gibutyag ni Col Garma nga ang kontraktor sa police station nagpa-blotter na sa Pardo police station ug ang kontraktor na ang mokiha kang Repollo tungod sa pagpangguba sa iLang gambalay sa dapit.
DUGANG PAKISUSI
Lakip sa ipasusi karon ni Col. Garma ang giingong pagpaggamit sa sound system ni Rustico Ygot, kadtong drug lord nga maoy tag-iya sa 18 kilos nga shabu, sa usa ka kalihukan sa barangay apan wa matino kon libre o giabangan.
Duol niadtong balay nga giabangan ni Elymar Ancajas, didto gibutang ang sound system ni Ygot, subay sa ilang nasagap nga taho apan ilang susihon pa kini. (PAC, AYB)