HUGOT nga seguridad ang gipatuman sa mga simbahan ning pagtamod sa Ash Wednesday diin daghang mga manimbahay ang nahidangat sa St.Augustine, Cathedral, sa siyudad sa Cagayan de Oro.
Nasayran nga ubay-ubay nga puwersa ang makita sa simbahan ilabi na ang gipakatag gikan sa City Mobile Force Company (CMFC), Special Weapons and Tactics team, K-9 ug uban pa.
Miingon si Senior Police Officer 4 Rommel Villaro, sa Police Station 1 sa Divisoria, nga hugot nga seguridad ang gipatuman aron nga mamahimong malinawon ang maong kalihokan sa simbahan ug luwas ang mga nanimba.
“Sa karon atong gidugangan ang puwersa sa personnel diri sa CMFC ang purpose para sa kahusay ug kalinaw sa simbahan, ubay-ubay atong deployment sa Cagayan de Oro City Police Office,” matud niini.
Nanawagan usab kini nga dili na lamang magdala og mga dagkong butang ilabi na mga backpack kung ugaling mosimba tungod na usab sa gipatuman nga “no backpack policy.”
Ubay-ubay usab ka mga backpack ang nangabilin sa baggage area ilabi na nga dunay espesiyal nga iskedyul sa misa ang Liceo de Cagayan University alang sa ilang mga estudyante.
Sa pagsulat ning balita padayon ang pagbantay sa kapulisan sa mga simbahan. (KCS)