ANG hepe sa Investigation and Detective Management Branch (IDMB) sa Cebu Provincial Police Office (CPPO) nitug-an nga adunay reklamo kaniadto batok ni anhing Chief Master Sergeant Mikie Espina labot sa kalambigitan niini sa illegal nga drugas sa dakbayan sa Talisay.
Apan gibutyag ni Police Lieutenant Colonel Eloveo Marquez nga wala kini mapasakai og kaso inay gibalhin kini sa Police Regional Office-Bicol diin sa Masbate siya gidestino niadtong July 15, 2016 sigun sa records nga ilang nakuha sa Police Regional Office (PRO)-Central Visayas.
Gipasubay pa karon sa kapulisan sa dakbayan sa Talisay ang mga CCTV camera sa dapit diin gipusil si Espina sa usa ka sniper samtang naglingkod kini sa ilang balkonahe sa ilang balay.
Sa pagkakaron, niingon si Marquez nga dili pa sila makatumbok kung nagsakay ba gyud og puti nga van ang mga suspek sanglit ila pang gipangkuha ang mga ebedensya lakip na ang pagkuha sa pamahayag sa mga saksi.
Ang pamilya ni Espina unang mitug-an sa kapulisan nga adunay hulga sa kinabuhi ang maong pulis gikan sa grupo sa Kuratong Baleleng sa dakbayan sa Talisay.