AMINADO si Misamis Oriental Governor Yevgeny Vincente Emano nga dako ang pagsalig sa walhong grupo sa New People's Army (NPA) kung mapadayon ang localized peace talk kung ang makig dayalogo ug pangunahan ni kanhi mayor Dongkoy Emano.
“Actually ang nakanindot kay nireply ang Communist Party of the Philippines- NPA nga willing sila nga mosalig kung si Mayor Dongkoy ang mag-negotiate para sa localized peace talk pero naabtan lagi ta ug martial mao sad to giundang sad nato,” matud ni Emano.
Sa bag-ong paghidangat ni Special Assistant to the President ug karon modagan pagka senador Bong Go, iyang gibutyag nga andam kaayo si Presidente Rodrigo Duterte nga ipadayon ang peace talk.
Uyon si Emano tungod kay sila mismo sa probinsya aduna nay local committee nga gipangulohan ni Dongkoy apan nahunong lang tungod kay ubos ang pulo sa Mindanao sa martial law.
Matud ni Emano nga nitubag ang NPA ug miuyon nga pangunahan kini ni Dongkoy.
Dugang ni Emano nga malipay siya kung mismo si Presidente Rodrigo Duterte mopadayon sa plano sa hisgotanang pangkalinaw tungod kay walay probinsya ug nasod nga magmalinawon kung kini magsige og kagubot.
“Nagtuo ko nga walay hangtod karon nga probinsya ug lungsod nga molambo kung magkagidlay ug magkagubot lisod lang kung di mapaluyohan sa national government,” matud ni Emano ug uyon kaayong suportahan ang hisgotanang pangkalinaw.
Sa iyang bahin sab ni Go, gipasabot sab niini nga buot niyang ma-localized ang peace talk tali sa NPA.
“Hapit na nga magkaroon tayo ng resumptions of talks. Kadtong mga kondisyones nga gipangayo ni Presidente Duterte. Nisalig mi sa ila [NPA] ug akong ipaabot kanila nga salig mo kay Presidente Duterte kay walay laing lider nga pwede ninyo ma-istorya with all the sincerity,” butyag ni Go. (SVB)