LIBRE na ang pagpacheck-up sa mga empleyado sa Department of Education (DepEd)- Northern Mindanao sa J.R Borja General Hospital, kini human napirmahan ang memorandum of agreement niadtong Miyerkules, Marso 6, sa mayor’s conference room.
Tumong sa maong Moa nga mas mapalapdan pa ang serbisyo sa PhilHealth diin makabenepisyo niini ang mga magtutudlo ug lakip na ang mga staff sa tibuok Northern Mindanao.
Makapahimulos niining maong programa ang mokabat sa 150 ka mga empleyado sa DepEd lakip na ang ilang mga pamilya sa tinuig nga pagpa check-up sa J.R Borja General Hospital.
Nagmapasalamat usab ang DepEd ilabi na si Regional Dr. Arturo Bayocot, nga gumikan kay importante kini kaayo gani gikasubo niini ang nahitabo sa dihang dunay empleyado sa DepEd central office nga igo lamang nagtraining apan nakabsan sa kinabuhi gumikan sa hypertension.
“He was rushed to the hospital tapos wala gyud naagapan and the reason why because he has been diagnosed with hypertension but has never been religious in taking medicines, this Moa signing is a very good move to really prepare kasi prevention is better than cure,” matud ni Bayocot.
Matud usab ni Marlon Niño Arrabaca, head sa PhilHealth Cagayan de Oro, nga kining maong kasabotan maghatag og access sa mga personahe sa DepEd diha sa mga health center ilabi na sa city hospital.
“This is basically the gist kung unsa ang mahitabo, tagaan nato og access ang personahe sa DepEd sa J. R Borja or in the health center ba kaha mao ni ang mo formalized sa tong panagsabot with DepeEd and local government unit,” matud niini.
Samtang nibutyag usab si Mayor Oscar Moreno nga gawas sa paghatag og serbisyo pagpangandam usab kini diha sa Universal Health Care law ug giingong sa wala pa kini nga bala-od naghimo na niini ang lokal nga kagamhanan sa siyudad.
“Aside from the service that we are giving and of course to the assistance that PhilHealth is providing this also prepares us for the Universal health care law which is very revolutionary, we need to level up, usa sa mga features sa bag-ong bala-od is integrated na ang health services sa city ug sa probinsya,” matud ni Moreno.
Samtang si Dr. Ramon Nery, JRBGH chief niingon nga maghimo sila og gitawag nga express lane alang sa mga magtutudlo nga mobisita sa ospital ug kumpiyansa kini nga ang city hospital makahatag sa mga gikinahanglan nga mga serbisyo diha sa panglawas.
Ang maong programa gitawag nga “Tsekap” o Tamang Serbisyong Kalusugang Pampamilya diin naghatag og mga nag-unang panginahanglanon diha sa serbisyong panglawas lakip na ang eksaminasiyon sa pisikal,sa blood pressure measurement, eksaminasiyon sa mata, ngipon ug sa dalunggan lakip na usab sa suso ug mga laboratory test sama sa blood sugar testing, ihi, blood typing,malaria smear testing, eye check-up, blood count ug bisan sa mga bag-ong nahimugso nga mga bata.