SUMA sa panultihon “There no permanent friends or enemies in politics only permanent interests.” Mao ba kini ang mahitabo kang kanhi Speaker Pantaleon “Bebot” Alvarez nga usa sa mga pangulo sa Partido Demokratikong Pilipino-Lakas ng Bayan (PDP-Laban) ni Presidente Duterte? Kini si Alvarez maoy usa sa mga unang naninguha nga modagan gayud si Davao City Mayor Rodrigo Duterte pagka-presidente. Usa siya ka confidante ni Duterte. Gani gituhoan man nga siya maoy mipatuman sa mga kagustohan sa presidente didto sa ubos balay-balauranan.
Dimalas lang kay sa dihang gitukod ni Davao City Mayor Sara Duterte Carpio ang Hugpong ng Pagbabago, nga usa ka regional political party, gisaway kini ni Alvarez pinaagi sa pagtawag niini nga opposition party. Sayud tingali si Speaker Alvarez nga gitukod ni Mayor Sara ang Hugpong aron maoy pasilungan sa mga kaatbang niya nga si Davao del Norte 2nd district Cong. Antonio “Tony “Boy” Floirendo, Jr.ug uban niyang kaaway sa pulitika sa Davao del Norte. Si Alvarez magpapili pag-usab pagka-kongresista sa 1st district sa Davao Del Norte apan atbangan na siya ni Davao del Norte Gov. Anthony del Rosario nga ig-agaw ni Floirendo.
Kahinumduman nga dinhi sa Sugbo atol sa Barug-PDP rally gipahibawo sa presidente nga si Inday Sara na ang iyang gitugyanan sa mga desisyon kalabot sa pulitika. Sa ato pa estudo na si Bebot Alvarez. Mao kini ang pultika. Ang nahitabo kang kanhi speaker Alvarez mahimong mahitabo usab sa ubang mga pulitiko nga sakop sa PDP Laban nga gi-indosar ni Presidente Duterte sa nagkalainlaing mga rally. Naa man guy giduso sa presidente nga mga senador nga wala sa listahan sa Hugpong. Ang mga kandidato sa presidente wala mag-apil kang Sen. Jinggoy Estrada ug Sen. Bong Revilla apan gisabak kini ni Mayor Sara. Sa local politics, anaa usay mga kandidato kang kinsang mga kamut gi-isa ni Pres. Duterte apan dili maoy kandidato ni Inday Sara. Hanap pa hinuon kini karon kay sa Marso 29 pa man magsugod ang election campaign sa mga local officials.
•••
Namugos ang mga kandidato sa pagka-senador nga ubos sa Otso Deretso nga mag-debati sila ug ang mga kandidato sa Hugpong ng Pagbabago nga pinanguluhan ni Davao City Mayor Sara Duterte Carpio. Apan gibaliwala lang kini sa mga kandidato sa Hugpong kay sumala nila nagkinahanglan lang og publicity ang taga-oposisyon. Dili baya usab basta-basta ang mga kandidato sa Otso Deretso nga sila si Sen. Bam Aquino, Magdalo Partylist Cong. Gary Alejano, human rights lawyer Manuel Diokno, kanhi Solicitor General Florin Hilbay, election lawyer Romulo Macalintal , kanhi Cong. Erin Tañada ug Marawi civic leader Samira Gutoc – Tomawis ug kanhi senador Mar Roxas. Si Sen. Francis Pangilinan maoy ilang campaign manager. Iyang giangkon nga kon himuon ang eleksiyon ugma duha lamang ang posibling modaug sa ilang grupo. Wa ko magtuo nga mahitabo kining maong debate. Apan anaa na may mga debati nga gipasi-ugdahan sa nagkalainlaing network. (mannyrabacal1144@gmailcom)