UBAY-ubay na sa mga gikatahapang durugista, bisan mga pulis nga giingong nalambigit kang Franz Sabalones, napatay sa kapulisan o wa mailhing mga tawo.
Apan hain man si Sabalones human kini nakabiya sa Camp Crame diin siya ni-surrender?
Daghan ang mga misteryo nga naglimin kang Sabalones kay human siya gi-custody sa Camp Crame, way bisan usa ka opisyal sa kapulisan ang nasayod.
Human siya mahanaw, sagad sa dagkong illegal drugs nga nasakmit ug gipamatay nga durugista iyang mga gaway. Samtang nag-anam og kamatay ang iyang mga sinaligan ug gaway, giingon sa mga pulis nga blangko sila hain si Franz.
Laing butang nga makapalibog kay way bisan usa ka kaso ang gi-file batok kaniya nga unta niangkon man siya nga drug lord. Siya pa gani ang nibutyag sa iyang drug matrix, uban sa mga protector niya sa hut-ong sa kapulisan.
Di sama kang Kerwin Espinosa, kinsa niangkon nga drug lord, gipasakaan og kaso sa kapulisan, uban kang negusyante Peter Lim. Niangkon na man kaha siya, nganong wa may kaso nga gipasaka?
Wa tuoy kaso nga gipasaka, apan gipaembargo ang iyang mga kabtangan ug kayutaan. Mas makapalibog ug makapahibung, di ba?
Maora na hinuon og kining dagan karon susama og script sa mga salida sa sine, diin ang usa ka kriminal gawasnon bugti sa mga impormasyon nga iyang gipanghatag.
Imposible nga yano rang gibuhian si Franz sa kapulisan taliwa sa kalapad ug kadaku sa iyang operasyon sa illegal drugs. Di siya yano nga street pusher.
Taliwa sa dagan sa kampanya sa illegal drugs ug sa wa pa mangasulbad nga mga pagpamatay sa mga tawo sa illegal drugs dinhi sa Sugbo, labina sa southern Cebu, pila pa kaha ka mga tawo ang mangatumba kay apil sa grupo ni Sabalones? Kanus-a usab kaha matubag kining mga pangutana bunga sa misteryo sa kinabuhi karon ni Franz Sabalones?